كەركووك.. هێرش كرایە سەر بارەگایەكی سەربازیی میلیشیاكانی حەشدی شەعبی

دوای داگیركردنی كەركووك چەندین جار لە لایەن پێشمەرگە خۆبەخشەكانەوە هێڕشكراوەتەوە سەر بنكەو بارەگاكانی حەشد وەك وەڵامێك بۆ ئەو دژایەتیانەی كە حەشد دژ بە كورد دەیكات لەم شارەدا, ئەمڕۆ پێنجشەممە 23/ 11/ 2017 سەرچاوەیەكی ئەمنی لە شاری كەركووك، ڕای گەیاند، چەكدارانی نەناسراو تەقەیان لە بارەگایەكی هێزە سەربازییەكانی سەر بە میلیشیاكانی حەشدی شەعبی كرد و هەڵاتن.

سەرچاوە ئەمنییەكەی كەركووك، بە ماڵپەری (غەد پرێس)ی سەر بە میلیشیاكانی حەشدی شەعبی ڕاگەیاندووە، ئەمشەو ژمارەیەك چەكدار هێرشیان كردە سەر بارەگایەكی سەربازیی كە لە ناوچەی فەیلەقە لە ناوەڕاستی شاری كەركووك.

سەرچاوەكە ئاماژەی بەوەش دا، كە دوای هیرشەكە، میلیشیاكانی حەشدی شەعبی ناوچەكەیان چواردەور گرتووە و بەدوای هێرشبەرەكاندا دەگەڕێن.

لە 16ی ئۆكتۆبەری 2017، میلیشیاكانی حەشدی شەعبی هێرشیان كردە سەر شاری كەركووك و بەهاوكاری گروپێكی نێو یەكێتی، شارەكەیان داگیر كرد، لەوكاتەوە دۆخی ئەمنی شارەكە تێكچووە و چەندین جار هێرش كراوەتە سەر میلیشیاكان.