بزووتنەوەی گۆڕان درزی تێكەوت بوو بە دوو باڵ

دوای ئەوەی بزووتنەوەی گۆڕان سەركردایەتی تازەی هەلبژارد, هەلبژاردنەكان بوونە مایەیی نیگەرانی بەشێكی زۆری هەڵسوڕاوانی بزووتنەوەكە كە لە ئێستاشدا بە مەبەستی كۆكردنەوەی ئەو كەسانەی لە خانەی راپەڕاندنی بزووتنەوەی گۆڕان نیگەرانن، سەركردەیەكی بزووتنەوەی گۆڕان كار لەسەر درووستكردنی باڵێك دەكات.
لەو بارەیەوە سەیوان جەزا، هەڵسووڕاوی بزووتنەوەی گۆڕان، ڕاگەیاند: “گرفتی گۆڕان زیاتر بووە، كەمتر نەبووە، ئێمە دوو مانگ لەمەوبەر نامەمان داوەتە خانەی راپەڕاندن بۆ چاككردنی دۆخی گۆڕان، تائێستا وەڵامیان نەداتەوە، ئێستاش دەنگی ناڕازیی گۆڕان لە دەوری قادری حاجی عەلی كۆبووەتەوە، یان بەرەیەكی چاكسازی لەناو گۆڕان دەبێت دروست بكرێت، یان ناكرێت تاسەر گۆڕان بەم دۆخەوە ھەنگاو بنێت، چونكە ھەڵبژاردنەكانی كوردستان لەئارادایە”.
بە بڕوای ئەو هەڵسووڕاوەی گۆڕان، ڕێككەوتنی گۆڕان و یەكێتی لە بەرژەوەندیی چەند كەسێك نووسراوە و ئێستاش ”لەپێناو چەند كەسێك، لەگەڵ یەكێتی ماوەتەوە، بەتایبەت ئەوانەی ڕۆڵیان ھەبووە لە 16ی ئۆكۆتبەر“.
لەسەر هەمان بابەت مەحموود بیكەیسی، هەڵسووڕاوی بزووتنەوەی گۆڕان ڕایگەیاندووە: ”نامانەوێت گۆڕان وەك یەكێتی لێبێت، ئەگەر گرفتێك ھەیە، لەنێوان جڤات و خانەی ڕاپەڕاندن دەبێت چارەسەر بكرێت و گفتوگۆ ھەبێت، بەپێچەوانەوە مەترسی لەسەر گۆڕان دروست دەكات”. گوتیشی: “دروستكردنی بەرەی نوێ لەناو گۆڕان باش نابێت“.
لەلایەن خۆیەوە لە وتارێكدا، ھێمن حەسەن كە كەسێكی نزیكە لە بزووتنەوەی گۆڕان، لە وتاریكدا نووسیویەتی: “نامەكەی قادری حاجی عەلی گوزارشتە لە نیگەرانیی زۆرایەتیی لایەنگر و هەڵسووڕاوانی گۆڕان، ئەگەر نەشڵێم ھەمووی، ڕۆژانە ژوورەكەی كاك قادر پڕە لەو ھەڵسووڕاو و لایەنگرانەی لە ئەدای بزووتنەوەی گۆڕان ناڕازین، ئەوەندەی من ئاگادارم، زۆرترین قەرەباڵغیی میوان لای قادری حاجی عەلییە، ئەمە لەخۆڕا نییە، بەڵكو پەیوەندیی بەو نیگەرانییەوە ھەیە كە ئەو لە ئیدارەدانی ئێستای گۆڕان ھەیەتی و ئەویشە گوێ شل دەكات بۆ نیگرانیی ئەو ھەڵسوڕاوانە”.
ئەوەشی ئاشكرا كردووە كە لەم ماوەیەدا لەگەڵ چەند هاوڕێیەكی سەردانی قادری حاجی عەلییان كردووە، ”هەرچەندە سەردانەكە دۆستانە بوو، بەڵام باسی دۆخەكە و گۆڕانیشمان كرد، ئەوەی لەنامەكەدا ھاتووە، بەشێكی لەدەمی خۆیەوە گوێمان لێ بوو، لەقسەكانیدا دەركەوت كە نیگەرانە، بەڵام بێدەنگیی ئەو لەچوارچێوەی پابەندبوونە بە دەستوور و یاساوڕێساكانی بزووتنەوەكەوە، ئەوانەشی لەوێ بوون، داوای شكاندنی ئەو بێدەنگییەیان لێ دەكرد“.