مه‌سرور بارزانى، راوێژكارى ئه‌نجوومه‌نى ئاسايشى هه‌رێمى كوردستان له‌ په‌يامێكدا كه‌ به‌ بۆنه‌ى ساڵيادى له‌دايكبوونى پێغه‌مبه‌رى ئيسلام بڵاويكردووه‌ته‌وه‌، رايگه‌ياند، ئومێد ده‌كه‌م ئه‌و بارودۆخه‌ی به‌ناهه‌ق به‌سه‌ر كوردستان هاتووه ته‌نها له‌به‌رئه‌وه‌ی داوای یه‌كسانی و ده‌سته‌به‌ركردنی مافه‌كانی ده‌كات، ‌كۆتایی بێت و گه‌ل و وڵاته‌كه‌مان به‌ ئامانجه‌كانی بگات و له‌ ئاسوده‌یی و به‌خته‌وه‌ری بژێت.

ده‌قى په‌يامه‌كه‌

به‌ناوی خوای گه‌وره‌ و دڵۆڤان

به‌بۆنه‌ی له‌دایكبوونی پێغه‌مبه‌ری مه‌زنمان محه‌مه‌د مسته‌فا( درودو سڵاوی خوای له‌سه‌ر بێت) پیرۆزبایی له‌ گشت موسڵمانانی كوردستان و جیهان ده‌كه‌م.

هیوادارم ئه‌و بۆنه‌ پیرۆزه‌ ببێته‌ هانده‌رێكی دی بۆ په‌ره‌پێدان و چه‌سپاندنی گیانی برایه‌تی و خۆشه‌ویستی و پێكه‌وه‌ژیانی ئاشتیانه‌ له‌نێوان سه‌رجه‌م مه‌زهه‌ب و ئاین و نه‌ته‌وه‌ جیاوازه‌كان به‌ ئاراسته‌ی به‌دیهاتنی ئاشتی و ته‌بایی و سڕینه‌وه‌ی توندوتیژی و رێگه‌گرتن له‌ به‌كارهێنانی ئاین بۆ مه‌رامی دوور له‌ په‌یامی راسته‌قینه‌ی ئاینی پیرۆزی ئیسلام، كه‌ په‌یامی خۆشه‌ویستی و ته‌بایی نێوان مرۆڤه‌كانه‌.

هه‌ر به‌م بۆنه‌یه‌وه‌ ئومێد ده‌كه‌م ئه‌و بارودۆخه‌ی به‌ناهه‌ق به‌سه‌ر كوردستان هاتووه ته‌نها له‌به‌رئه‌وه‌ی داوای یه‌كسانی و ده‌سته‌به‌ركردنی مافه‌كانی ده‌كات، ‌كۆتایی بێت و گه‌ل و وڵاته‌كه‌مان به‌ ئامانجه‌كانی بگات و له‌ ئاسوده‌یی و به‌خته‌وه‌ری بژێت.

مه‌سرور بارزانی

راوێژكاری ئه‌نجوومه‌نی ئاسایشی هه‌رێمی كوردستان

29/11/2017