وه‌زاره‌تی پێشمه‌رگه بۆ عه‌بادی:نازانين و قه‌ت له‌وه تێناگه‌ين چۆن وێژدانت ئارام ده‌بێت؟
وه‌زاره‌تی پێشمه‌رگه‌ی حكومه‌تی هه‌رێم ته‌واوی لێدوانه‌كانی عه‌بادی له باره‌ی به‌رچاونه‌گرتنی رۆڵی پێشمه‌رگه‌ی كوردستان له شه‌ڕی تیرۆر و داعش له كوردستان و عێراق، ده‌ڵێت” نازانين و قه‌ت له‌وه تێناگه‌ين چۆن وێژدانى عه‌بادی ئارام ده‌بێت؟.
ده‌قی راگه‌یاندراوه‌كه‌ی وه‌زاره‌تی پێشمه‌رگه پاش لیدوانه‌كه‌ی عه‌بادی دوێنێ شه‌ممه:-
رۆژی شه‌ممه 9/12/2017 به‌ڕێز حه‌يده‌ر عه‌بادى سه‌رۆك وه‌زيرانى عێراق له كاتێكدا كۆتاييهاتنى شه‌ڕى دژى داعشى له عێراق ڕاگه‌ياند، پيرۆزبايى له هه‌موو هێزه چه‌كداره‌كانى عێراق كرد و ناوى هێنان، به‌ڵام به هيچ شێوه‌يه‌ك ناوى پێشمه‌رگه‌ى نه‌هێنا و هيچ ئاماژه‌يه‌كى بۆ ڕۆڵ و قاره‌مانيه‌تيى پێشمه‌رگه له شه‌ڕى دژى داعشدا نه‌كرد.
به‌داخه‌وه به‌ڕێز عه‌بادى جارێكى ديكه‌ش نه‌يتوانى وه‌ك سه‌رۆك وه‌زيرانى وڵات مامه‌ڵه بكات و ڕۆڵى پێشمه‌رگه قاره‌مانه‌كانى كوردستان پشتگوێ نه‌خات، له كاتێكدا جيهان شاهيده كه يه‌كه‌مجار پێشمه‌رگه به‌ر له هه‌موو هێزه چه‌كداره‌كانى ديكه‌ى عێراق كه ئه‌و ناوى هێنان و پيرۆزبايى لێكردن، ئه‌فسانه‌ى داعشى تێكشاند و ئه‌گه‌ر پێشمه‌رگه نه‌بووايه هيچ دوور نه‌بوو ئێستاش داعش نيوه‌ى جوگرافياى عێراقى له‌ژێر ده‌ستدا نه‌بێت.
به‌ڕێز عه‌بادى كه ئه‌مجاره‌ش نه‌يتوانى ڕق و قينه‌ى خۆى بۆ پێشمه‌رگه بشارێته‌وه، نازانين و قه‌ت له‌وه تێناگه‌ين چۆن وێژدانى ئارام ده‌بێت؟، چى به منداڵان و خانه‌واده و كه‌سوكارى (١٨٢٤) پێشمه‌رگه‌ى شه‌هيد و زياتر له (10) هه‌زار پێشمه‌رگه‌ى بريندار ده‌ڵێت كه خۆى به سه‌رۆك وه‌زيرانيان ده‌زانێت و له‌پێناو شكاندنى داعشدا شه‌هيد و بريندار بوون؟! ئيتر به چ ڕوويه‌كه‌وه له وان و له گه‌لى كوردستان چاوه‌ڕوان ده‌كات ئينتيمايان بۆ عێراق هه‌بێت، له كاتێكدا ئه‌مه حاڵ و مامه‌ڵه‌ى سه‌رۆك وه‌زيرانه‌كه‌ى بێت؟!.
پێگه و ڕێز و خۆشه‌ويستيى پێشمه‌رگه و خانه‌واده سه‌ربه‌رزه‌كانيان له‌ناو گه‌لى كوردستان و له جيهانيشدا زۆر له‌وه گه‌وره‌تره ڕۆژێك له ڕۆژان پێويستى به پيرۆزباييى به‌ڕێز عه‌بادى و هه‌موو ئه‌وانه بێت كه به‌م شێوه‌يه بير ده‌كه‌نه‌وه و ڕه‌فتار ده‌كه‌ن، بۆيه پێشمه‌رگه نه چاوى لێيه، نه پێويستى به‌و پيرۆزبايى و پشووه هه‌يه كه به‌م بۆنه‌يه‌وه ڕاگه‌يه‌نراوه، به‌ڵام هه‌موومان به‌داخه‌وه‌ين كه ڕۆژانه ده‌بينين له جياتى هه‌وڵى زه‌مينه‌خۆشكردن بۆ گفتوگۆ و چاره‌سه‌ركردنى كێشه‌كان، جه‌نابى سه‌رۆك وه‌زيران پێچه‌وانه ده‌جوولێته‌وه!.
وه‌زاره‌تى كاروبارى پێشمه‌رگه
9/12/2017
