ئەمریكا: لە هەر كوێ ناسەقامگیری هەبێ دەستی ئێرانی تێدایە
لەگەڵ گرژبوونی زیاتی نێوانی ئەمریكا و ئێران, لە ئێستادا لێدوانی توندی دژ بەیەك ئاراستەدەكرێن, وەزیری بەرگریی ئەمریكاش دەڵێت، هەر ئاژاوە و پشێوییەك لە رۆژهەڵاتی نێوەڕاستدا هەبێ، دەستی ئێرانی تێدایە. دەشڵێت، هاوكاری هاوپەیمان و دۆستەكانیان دەكەن دژی هەژموونی ئێران.
لە كۆنفرانسێكی رۆژنامەڤانیدا لە پێنتاگۆن، جەیمس ماتیس، وەزیری بەرگریی ئەمریكا رایگەیاند، هەبوونی رێكاری سەربازیی دژی ئێران بە پێویست نازانێت، بەڵام دەڵێت وڵاتەكەی لە بواری دیپلۆماسییەوە كار لەسەر ئێران دەكەن و هاوكاری هاوپەیمان و دۆستەكانیان دەكەن دژی هەژموونی ئێران.
جەیمس ماتیس دەڵێت “سەیری هەر ئاژاوەیەك لە ناوچەكە دەكەی، دەتوانی دەستی ئێرانی تێدا بدۆزیتەوە”.
ماتیس دەڵێت، ئەو مووشەكەی حووسییەكان ئاراستەی سعودیەیان كردووە، لەلایەن ئێرانەوە پێیاندراوە. دەشڵێت،ئامادەبوونی باڵیۆزی ئەمریكا لە نەتەوەیەكگرتووەكان بۆ نیشاندانی شێوازی یارمەتیدانی حوسییەكان لەلایەن ئێرانەوە ئەو راستیە دەردەخات، كە ئەمریكا بۆ وەڵامدانەوەی ئێران زیاتر سوود لە رێگای دیپلۆماسی وەردەگرێت.
وەزیری بەرگریی ئەمریكا رایگەیاند، كۆنفرانسە رۆژنامەڤانیەكەی نیكی هایلی بەشێك بوو لە هەوڵێكی دیپلۆماسی بۆ ئەوەی واشنتن بۆ جیهانی روونبكاتەوە، كە ئێران لە رۆژهەڵاتی ناوەڕاستدا خەریكی چییە.
جەیمس ماتیس رەخنەی لە ئێران گرت لە بەرامبەر پاڵپشتیكردن لە حكومەتی سووریا و حیزبوڵڵای لوبنان. گوتی ئەوەی ئێران دەیكات نایاساییە و بەشداریكردنیشە لە كوشتنی خەڵكی بێتاواندا.
رۆژی چوارشەممە نیكی هایلی رایگەیاند، ئەو مووشەكەی لە سەرەتای مانگی رابردوودا لە یەمەنەوە ئاراستەی سعودیە كرا، لە ئێران دروستكرابوو و پاشماوەی مووشەكەكەیشی نیشانی رۆژنامەنووسان دا.
ئەو لێدوانەی وەزیری بەرگریی ئەمریكا هاوكاتە لەگەڵ ئامادەكردنی پڕۆژەیاسای چەند ئەندامێكی كۆنگرێسی ئەو وڵاتە لە دژی ئێران بەتۆمەتی “رۆڵی شەڕانگێزانەی لە درێژكردنەوەی شەڕ لە یەمەن”.
