به‌هاوكاری گروپی خائینی 16ی ئۆكتۆبه‌ر به‌ناو شاری سلێمانی رۆژانه 350 هه‌زار به‌رمیل نه‌وتی دزراوی كه‌ركووك ده‌برێته ئێران
میلیشاكانی حشدی شه‌عبی و سوپایی قودسی ئێرانی به‌هاوكاری گروپی خیانه‌تی 16ی ئۆكتۆبه‌ر، له ئێستادا 350 هه‌زار به‌رمیل نه‌وت به‌ناو پارێزگای سلێمانی ئاودیوی ئێران ده‌كه‌ن، له‌و باره‌یه‌وه،سەرۆکی لیستی برایەتی لە ئەنجومەنی پارێزگای کەرکووک ئاشکرای دەکات، ڕۆژانە 350 ھەزار بەرمیل نەوتی کەرکووک بە ڕێگای تانکەر دەبرێت بۆ ئێران.
له لێدوانێكی دا محەمەد کەمال، سەرۆکی لیستی برایەتی لە ئەنجومەنی پارێزگای کەرکووک ڕاگەیاند: “ئێستا نەوتی کەرکووک بە تانکەر دەبرێتە ئێران، تەنانەت ئێستا عێراق و ئێران کار دەکەن بۆ ئەوەی لە ماوەی دوو ساڵی داھاتوودا بە بۆری نەوتی کەرکووک ھەناردەی ئێران بکەن و ئێستا بە دیاریکراوی نەوتی کەرکووک بە تانکەر دەبرێتە کرماشان، ئاشکراشی کرد: “ئێستا ڕۆژانە 350 ھەزار بەرمیل نەوتی کەرکووک لەڕێگەی تانکەرەوە دەبرێتە ئێران”.
هه‌روه‌ها محەمەد کەمال ئاماژەی بۆ ئەوەش كرد: “گرووپەکە پێشتریش نەوتیان بە تانکەر بردووە بۆ ئێران و ئێستاش پاڵاوگەیەکیان ھەیە لە بازیان و پێشتریش ڕۆژانە 40 ھەزار بەرمیل نەوتیان دەناردە ئێران”. ڕوونیشی کردەوە: “ئێستا لە سنووری کەرکووک، شوێنێک ھەیە پێ دەگوترێت “وادی نەوت” و لەوێوە تانکەرەکان وەستاون و پڕ دەکرێن و ئیتر بەرەو سلێمانی دەبرێت و لەوێشەوە بۆ ئێران”.
پاش ئه‌نجامدانی خیانه‌تی 16ی ئۆكتۆبه‌ر و راده‌ست كردنی كه‌ركووك به میلیشیاكانی حشدی شه‌عبی و سوپای پاسدارانی ئێرانی و حزبڵا لوبنانی، واتا رۆژی 18ی ئۆكتۆبه‌ر، هه‌ریه‌كه له جێگری سكرتێری گشتی یه‌كێتی، كۆسره‌ت ره‌سوڵ و مه‌لا به‌ختیار به‌رپرسی ده‌سته‌ی كارگێری مه‌كته‌بی سیاسی، دانیان به‌وه دانا كه له‌ناو یه‌كێتی خیانه‌ت كراوه، ئۆباڵی خیانه‌ته‌كه‌شیان خسته پاڵ گروپێك له‌ناو یه‌كێتی كه پێكهاتوون له ” بافل تاڵه‌بانی و لاهور جه‌نگی و ئاراس جه‌نگی و ئاڵا تاڵه‌بانی” و به كاڵفامه‌كانی نێو یه‌كێتی ناویان بردن، به‌ڵام هه‌ر پاش ئه‌و رۆژه‌وه، كۆمه‌ڵی ئیسلامی و گۆڕان و باڵی كاڵفامه‌كان و به‌رهه‌م ساڵح هه‌وڵیانداوه، دیمه‌نی گریانی پێشمه‌رگه له خیانه‌تی كه‌ركووك بگۆڕن بۆ بابه‌تی ریفراندۆم و له‌وێشه‌وه‌ی به‌ناوی شكه‌سته‌وه، حكومه‌تی رزگاری نیشتمانی دامه‌زرێنن”.
