بۆ دواجار فواد مه‌عسووم به‌تووندی هاته سه‌ر خه‌ت، به‌عه‌بادی ده‌لێت تۆ ناتوانیت كورد له‌ناو ببه‌یت
سه‌رۆككۆماری عێراق له پشكی كورد فواد مه‌عسووم، كه به پیاوه بێده‌نگه‌كه ناسراوه له په‌یامێكی دا هۆشداری تووند ده‌داته حه‌یده‌ر عه‌بادی سه‌رۆكوه‌زیرانی عێراق و له په‌یامه‌كه‌دا رایگه‌یاند”ره‌تكردنه‌وه‌ی گفتوگۆ له‌گه‌ڵ كورد، باجه‌كه‌ی زۆر گه‌وره ده‌بێت و تۆ ناتوانێت به‌م شێوه‌یه قه‌واره‌ی كورد هه‌ڵوه‌شێنێته‌وه، هه‌روه‌ها ده‌شلێـ”ئه‌و له‌سه‌ر هه‌وڵه‌كانی بۆ ده‌ستپێكردنی گفتوگۆی نێوان هه‌ولێر به‌غدا به‌رده‌وامه، له‌و پێناوه‌شدا دوو نامه‌ی جیاوازی ئاراسته‌ی هه‌ره‌یه‌ك له نێچیرڤان بارزانی سه‌رۆكی حكومه‌تی هه‌رێمی كوردستان و حه‌یده‌ر عه‌بادی سه‌رۆك وه‌زیرانی عێراق كردووه، به‌ڵام تائێستا وه‌ڵامی وه‌رنه‌گرتووه”.
له میانی لێدوانێكی رۆژنامه‌وانی دا سه‌رۆككۆماری عێراق ” فواد مه‌عسووم” له‌باره‌ی ریفراندۆم ده‌لێـ”سه‌رجه‌م لایه‌نه‌كان له به‌غدا له دژی ئه‌و پرۆسه‌یه بوون، به‌ڵام دوای بڕیاری دادگای عێراق، له‌ئێستادا هه‌موویان داوای ده‌ستپێكردنی گفتوگۆ ده‌كه‌ن و ته‌نیا لایه‌نێكیش نییه كه دانوستانه‌كانی نێوان هه‌ولێر و به‌غدا ره‌ت بكاته‌‌وه و ده‌شلێـ”باجی ره‌تكردنه‌وه‌ی گفتوگۆ له‌گه‌ڵ كورد زۆر گه‌وره ده‌بێت و له كۆتاییدا به‌هۆی فشاره ناوخۆیی و نێوده‌وڵه‌تیه‌كان عه‌بادی ناتوانێت له ده‌ره‌نجامه‌كانی رابكات”، گوتیشی “عه‌بادی توانای ئه‌وه‌ی نییه قه‌واره‌ی كوردستان له‌ناو ببات”.
هه‌ر له‌باره‌ی پرۆژه‌كه‌ی سه‌رۆككۆماری عێراق راوێژكاری سه‌رۆكایه‌تی كۆماری عێراق ( ئه‌میر كینانی) ئاشكرا ده‌كات، ده‌لێـ” ده‌ستپێشخه‌ریه‌كه‌ی فوئاد مه‌عسوم بۆ چاره‌سه‌ری كێشه‌كانی نێوان هه‌ولێر و به‌غدا، ده‌ستپێشخه‌ریه‌كه له‌سه‌ر ره‌زامه‌ندی هه‌ریه‌ك له نوری مالكی و ئه‌یاد عه‌للاوی جێگرانی سه‌رۆك كۆمار و سه‌لیم جبووری سه‌رۆكی ئه‌نجوومه‌نی نوێنه‌رانی عێراق خراوه‌ته روو، روونیشی كردبووه‌وه، مالكی و عه‌للاوی و جبووری داوایان له مه‌عسوم كردبوو، ده‌ستپێشخه‌ریه‌ك بۆ كردنه‌وه‌ی ده‌رگای گفتوگۆ له‌نێوان هه‌ولێر و به‌غداد بكات، بۆ ئه‌و مه‌به‌سته‌ش سه‌رۆك كۆماری عێراق نامه‌ی جیاوازی ئاراسته‌ی هه‌ردوو حكومه‌تی هه‌رێمی كوردستان و عێراقی كردووه.
