ناوەڕاستی ئەم ھەفتەیە پەرلەمانی كوردستان لە كۆبوونەوەیەكدا خوێندنەوە بۆ پڕۆژە یاسای چاكسازی دەكات
![](https://xwakurk.com/wp-content/uploads/2017/09/1-copy.jpg)
دوا ئەوەی حكومەتی هەرێمی كوردستان پڕۆژەیاسایەكی بۆ چاكسازی لە موچەو تەواوی كەرتەكانی حكومەت ئاراستەی پەرلەمان كرد, جێگری سەرۆكی لێژنەی ناوخۆ و ئاسایش، لە پەرلەمانی كوردستان، ڕای دەگەیەنێت، ئەم ھەفتەیە پەرلەمانی كوردستان كۆدەبێتەوە و چەند پرۆژە یاسایەكیش تاوتوێ دەكرێت.
نازم ھەركی، جێگری سەرۆكی لێژنەی ناوخۆ و ئاسایش لە پەرلەمانی كوردستان، ڕایگەیاند: “ھەرچەندە بە فەرمی ھێشتا ڕانەگەیەنراوە كە چ ڕۆژێك كۆبوونەوەی پەرلەمانی كوردستان ئەنجام دەدرێت، بەڵام قەسە لەسەر ئەوەیە كە ڕۆژی چوارشەممەی داھاتوو، كۆبوونەوەكە بكرێت”.
جێگری سەرۆكی لێژنەی ناوخۆ و ئاسایش لە پەرلەمان، ئەوەشی خستە روو، كە بە 48 كاتژمێر پێش كۆبوونەوەكە، لە سایتی فەرمیی پەرلەمانی كوردستان، وادەكە بڵاو دەكرێتەوە و بەرنامەی كاریش دادەنرێت.
ئاشكراشی كرد، كە لەوانەیە لە كۆبوونەوەكەی پەرلەمان، پڕۆژەی چاكسازی حكوومەت خوێندنەوەی یەكەمی بۆ بكرێت و دواتر ئاراستەی لێژنە پەیوەندیدارەكان دەكرێت، تا ئەوانیش تاوتوێی بكەن، چونكە دەبێت كۆدەنگی ھەموو فراكسیۆنەكانی پەرلەمان و لێژنە پەیوەندیدارەكانی لەسەر بێت.
نازم ھەركی، جێگری سەرۆكی لێژنەی ناوخۆ و ئاسایش لە پەرلەمانی كوردستان گوتیشی: “سبەی دووشەممە 8/1/2018 ھەریەكە لە لێژنەی یاسای و لێژنەی ناوخۆ، لەسەر ھەمواری یاسای ژمارە 86ی ساڵی 2004ی ھاتوچۆ و غەرامە كۆدەبنەوە، راپۆرتی لەسەر دروست دەكەین بۆ كۆبوونەوەی داھاتوو”.