ساڵی 2017 لەهەرێمی كوردستان زیاترلە چوارهەزارو 400رووداوی هاتوچۆ ڕوویان داوە
بەڕێوەبەری پلاندانان لەبەرێوەبەرایەتی هاتوچۆی هەرێمی كوردستان ڕایدەگەیەنێت لەساڵی 2017 دا 4410 ڕووداوی هاتوچۆ تۆماركراوە ، تیایدا نزیكەی هەشت هەزار قوربانی هەبووە و لە (60%) ڕووداوەكانیش بەهۆی خێراییەوە بووە .
عەقید (ئەسعەد كەریم) بەڕێوەبەری پلاندانان لەبەرێوەبەرایەتی هاتوچۆی هەرێمی كوردستان لەكۆنگرەیەكی ڕۆژنامەوانیدا، ئامارەكانی هاتوچۆی بۆ ساڵی 2017 بڵاوكردەوە‌و ڕایگەیاند، لەساڵی 2017دا 4410 ڕووداوی هاتوچۆ ڕوویانداوە، تیایدا 7249 كەس برینداربوون، 689 كەس گیانیان لەدەستداوە، ڕووداو‌و قوربانیەكان بەراورد بەساڵی 2016 كەمیكردوە، هۆكاری سەرەكی ڕووداوەكانیش خێرایی لێخوڕین بووە، بەجۆرێك لە 60% ڕووداوەكان بەهۆی خێراییەوە بووە، 2656 ڕووداو هۆكارەكەی خێرایی بووە 389 ڕووداو مەرجی توندوتۆلی نەبووە 1365 ڕووداو بەهۆی كەمتەرخەمی بووە، وەك بەكارهێنانی مۆبایل‌و خۆ خەریككردن بەئامێرەكانی ناو ئۆتۆمبیل.
داهاتەكان لەساڵی 2017دا، 269 ملیارو 757ملیۆن و 343هەزار دیناربووە، داهاتی ئۆتۆمبیل زیاتر لە 30 ملیار مۆڵەت زیاتر لەهەشت ملیار سزادان، زیاتر لە 61ملیار داهاتی كە بەچەك وەرگیراون، 81ملیار داهاتی تابلۆ 41 ملیار ژینگەو شەقام زیاتر لە 37 ملیار دینار بووە، داهاتی جۆراوجۆر 226ملیۆن بووە، داهاتی كۆمەك زیاتر لە 9ملیاردیناربوە، وتیشی:”سەرپێچیەكان زیادیكردوە لەو ساڵەدا یەك ملیۆن و 498هەزار و 155 سەرپێچی تۆماركراوە و 179 هەزار و 928 سەرپێچی بەراورد بە ساڵی 2016 زیادیكردوە”.
ئەوەشی خستەڕوو ، ساڵی ڕابردوو 69 هەزار و 97 مۆڵەت دراوە كە 12 هەزار و 482 یان بە ئافرەتان دراوە، بەمەش كۆی گشتی مۆڵەت لەهەرێمی كوردستان ملیۆنێك‌و 647 هەزار و 283 مۆڵەت بەشوفێران دراوە .
