دواین زانیاری لەسەر كۆبوونەوەی بارزانی و شاندی ئەمریكی ئاشكرا دەبێت
خواكوڕك
ماڵپەری سەرۆكایەتی هەرێمی كوردستان پاش كۆتای هاتنی كۆبوونەوەی شاندی ئەمریكی و بارزانی هەواڵێكی لەو بارەوە بڵاو كردەوە.
سەرۆكی هەرێمی كوردستان لە ڕۆژی پێنجشەممە 15ـی 9ـی 2016 پێشوازی لە شاندێكی باڵای سیاسی و سەربازیی ئەمەریكا دەكات لە سەلاحەدین شاندەكەی ئەمریكا پێكهاتبوون لە تۆنی بلینكێن جێگری وەزیری دەرەوەی ئەمەریكا، برێت مەكگورگ نوێنەری تایبەتی سەرۆك ئۆباما بۆ هاوپەیمانێتیی شەڕی دژی داعش و دۆگڵاس سیڵیمەن باڵیۆزی تازەی ئەمەریكا لە عێراق و جەنەڕاڵ ستێڤن داونسێند فەرماندەی هێزەكانی ئەمەریكا لە عێراق كێن گڕووس كونسوڵی ئەمەریكا لە هەولێر و ژمارەیەك ڕاوێژكاری وەزارەتی دەرەوەی ئەمەریكا.
وەك لە هەواڵەكەدا هاتووە ،لە دیدارەكەدا جێگری وەزیری دەرەوەی ئەمەریكا سڵاوی سەرۆك ئۆباما و جۆ بایدنی جێگری سەرۆكی ئەمەریكای بە سەرۆك بارزانی گەیاند و سپاسی ڕۆڵ و قارەمانێتیی هێزی پێشمەرگەی كرد و پێزانینی بۆ سەركردایەتیی سەرۆك بارزانی لە مسۆگەركردنی سەركەوتنەكان لە دژی تیرۆریستانی داعش هەبوو و ڕاشیگەیاند بەهۆی ئازایەتیی پێشمەرگە پێشكەوتنی بەرچاو لە شەڕی دژی داعش بەدەست هاتووە.
لەبەرانبەردا سەرۆك بارزانی سوپاسی سەرۆك ئۆباما و گەل و حكوومەت و سوپای ئەمەریكای كرد كە لە شەڕی تیرۆریستاندا پاڵپشتی گەلی كوردستان و هێزی پێشمەرگە بوونە و هیوای ئەوەیشی خواست كە بە هاوكاری و كاری هاوبەشی هەردوولا سەركەوتنی گەورەتر لەدژی تیرۆریستان بەدەست بهێندرێت.
هەر لەم كۆبوونەوەیەدا باس لە ئامادەكارییەكان و پلانی سەربازی بۆ ئازادكردنی موسڵ و هەماهەنگی نێوان هێزە بەشداربووەكان كرایەوە و سەرۆك بارزانی باسی لە بایەخی بوونی پلانی سیاسیی بۆ قۆناغی دوای ئازادكردنی موسڵ كردەوە ئەویش لەپێناو ڕێگەگرتن لە قووڵتربوونی كێشەكان و پاراستن و پێدانی دڵنیایی بە پێكهاتەكان بە تایبەت مەسیحی و ئێزییدییەكانی پارێزگای نەینەوا.
لە بەشێكی دیكەی كۆبوونەوەكەدا كە ماڵپەری سەرۆكایەتی هەرێم بڵاوی كردۆتەوە شاندی میوان وێڕای جەختكردنەوە لە ڕۆڵ و پێگەی هێزی پێشمەرگەی كوردستان لە شەڕی ئازادكردنی موسڵ، پلان و ستراتیژیی سەربازی و سیاسیی ئەمەریكای لە دەستپێكردنی ئۆپڕاسیۆنی ئازادكردنی موسڵ و هەماهەنگیی نێوان هێزی پێشمەرگە و هاوپەیمانان و هێزەكانی عێراقی بۆ سەرۆك بارزانی شی كردەوە و سەرۆك بارزانیش تێبینی و ئامۆژگاریی خۆی لەمەڕ پلانە سیاسی و سەربازییەكان بۆ شاندی میوان باس كرد.
هەر لەو كۆبوونەوەیەدا هەردوولا لەسەر بەردەوامیی گوشارهێنان بۆسەر تیرۆریستان هاوڕا بوون و و هەماهەنگی و ڕاوێژی بەردەوامی نێوان هەرێمی كوردستان و بەغدا و هاوپەیمانان دووپات كرایەوە.
