ترەمپ لەبارەی عەفرینەوە هۆشداری دەداتە تورکیا

ئەمریکا لەبارەی بارودۆخی عەفرین و پەلامارەکانی تورکیا ھۆشداریدەدات و داوای کەمکردنەوەی جموجۆڵە سە ربازییەکانی ئەو وڵاتە دەکات، سەرۆک کۆماری تورکیاش داوادەکات، کۆتایی بەپێدانی چەک بەپەیەگە بھێندرێت.
لەپەیوەندییەکی تەلەفۆنیدا کە ئەمشەو 24ی 1ی 2018 ئەنجامیاندا (دۆناڵد ترامپ) سەرۆکی ئەمریکاو( ڕەجەب تەیب ئەردۆغان) سەرۆککۆماری تورکیا جەختیان لەپاراستنی یەکپارچەیی خاکی سوریا کردەوەو بۆچوونەکانیان ئاڵوگۆڕکرد.

بەگوێرەی ئاژانسی ئەنادۆڵ، ئەردۆغان داوایکردوە پێدانی چەک بەیەکینەکانی پاراستنی گەل (یەپەگە) لەلایەن ئەمریکاوە ڕابگیرێت و لەبارەی ھێرشەکانی سەر عفرینیشەوە ڕایگەیاندوە: ئامانجیان پاککردنەوەی عەفرینە لەتیرۆر، دەیانەوێت ئاسایشی نەتەوەیی تورکیا بپارێزن.

ھاوکات، کۆشکی سپی لەڕاگەیەندراوێکدا لەبارەی ئەو پەیوەندییە تەلەفۆنییە بڵاویکردۆتەوە، دۆناڵد ترەمپ نیگەرانی خۆی لە لەسەر ھێرشەکانی سەر عفرین لەلایەن تورکیاوە دەربڕیووەو داواشی لەئەردۆغان کردوە، سنورێک بۆ جموجۆڵە سەربازییەکانی دابنێت و کەمی بکاتەوە.