یه‌كێتی داوای شوێنی یوسف محەمەد دەكات
(تەلار لەتیف) ئەندامی پەرلەمانی كوردستان لەفراكسیۆنی یەكێتی نیشتمانی كوردستان، لەبارەی پۆستی سەرۆكی پەرلەمانی كوردستانەوە روونكردنەوەیداو رایگەیاند:”تاوەكو ئێستا یوسف محەمەد، سەرۆكی پەرلەمانی كوردستانە، راستە ئەو دەستلەكاركێشانەوەی لەپۆستەكەی پێشكەشكردووە، بەڵام لە رووی یاساییەوە ھێشتا دەست لەكاركێشانەوەكەی قبووڵ نەكراوە، دەبێت دەستلەكاركێشانەوەكەی بێتە ناو ھۆڵی پەرلەمانەوەو پاش ئەوە قبووڵ دەكرێت، یان نا”.
تەلار لەتیف راشیگەیاند:”لەئەگەری ئەوەی دەستلەكاركێشانەوەكە قبووڵبكرێت لەبەر ئەوەی گۆڕان بڕیاری ئەوەی داوە لەپەرلەمان و حكومەت بكشێتەوە ئەو كاتە بە پێی ئیستیحقاقی ھەڵبژاردن پۆستی سەرۆكی پەرلەمان بۆ یەكێتی نیشتمانیی كوردستان دەبێت”.
لەبارەی گەیشتنی نامەی دەستلەكاركێشانەوەی سەرۆكی پەرلەمانی كوردستان، یوسف محەمەد و نەخستنە بەرنامەی كاری دانیشتنەكانی پەرلەمانەوە، ئەو پەرلەمانتارەی فراكسیۆنی یەكێتی رایگەیاند:”بەراستی ئەوە پرسێكە پەیوەندیدارە بەسەرۆكایەتی پەرلەمانی كوردستانەوە، بەڵام لە رووە یاساییەكەوە ھەر كاتێك ئەو پرسە ھاتنە ناو پەرلەمانی كوردستانەوەو دەستلەكاركێشانەوەكەی سەرۆكی پەرلەمان قبووڵ كرا، پەرلەمان یەك دانیشتن دەتوانێت ئامادەیی ھەبێت ئەو كاتەش ئەو دانیشتنەش بۆ ھەڵبژاردنی دەستەیەكی نوێ”.
