سه‌رۆك بارزانی بزانه ئه‌مرۆ چی گوتووه
سه‌رۆك بارزانی ئه‌مرۆ چوارشه‌ممه، له كۆبوونه‌وه‌یه‌كی دا له‌گه‌ڵ فراكسیۆنی پارتی دیموكراتی كوردستان لە پارلەمانی كوردستان، جەختی لە ئەرك و پێگەی ڕاستەقینەی پارلەمان لە ژیانی گەلی كوردستان كردەوە و، پەیوەست بە پڕۆسەی سیاسیی هەرێمی كوردستانیش سازدانی هەڵبژاردنی بە باشترین ڕێگەچارە بۆ ڕاستكردنەوەی پڕۆسەی سیاسیی هەرێم لە قەڵەم دا”.
ئه‌مرۆ چوارشه‌ممه، 14ـی 2ـی 2018، لە سەلاحەددین، سەرۆك مەسعوود بارزانی لەگەڵ فراكسیۆنی پارتی دیموكراتی كوردستان لە پارلەمانی كوردستان كۆ بووه‌وە، لەو كۆبوونەوەیەدا، فراكسیۆنی پارتی كورتەیەكی لەبارەی كار و چالاكییەكانی فراكسیۆن و پەیوەندییەكانیان لەگەڵ لایەنە سیاسییەكانی تر و هەڵبژاردنەكانی داهاتووی هەرێم بۆ سەرۆك بارزانی خستە ڕوو.
لە بەشێكی تری كۆبوونەوەكەدا، سەرۆك بارزانی لە وتەیەكدا بارودۆخی سیاسیی هەرێمایەتی و نێودەوڵەتی و دواپێشهاتە سیاسییەكانی عێراق و ناوخۆی كوردستانی بۆ ئامادەبووانی كۆبوونەوەكە شیی كردووە. هەروەها ڕۆشناییشی خستەسەر ڕیفراندۆم و ڕووداوەكانی 16ـی ئۆكتۆبەر و باسی لەو هۆكارانە كرد كە هانی گەلی كوردستانی دا، كە بەرەو ڕیفراندۆم هەنگاو بنێت و جەختی كردەوە، كە پێشێلكردنی دەستوور و تێكدانی تەوافوق و پارسەنگی و نەهێشتنی شەراكەت، وایكرد كە گەلی كوردستان بڕیاری ڕیفراندۆم بدات.
لە بەشێكی تری وتەكانیدا، سەرۆك بارزانی ئاماژەی بە ڕۆڵ و قوربانیدان و خۆڕاگریی هێزی پێشمەرگەی كوردستان دا كە ڕێگەی لە سەركەوتنی پیلانی نەیاران گرتووە و هاوكێشەكانی بە قازانجی گەلی كوردستان شكاندووەتەوە، هه‌روه‌ها سەرۆك بارزانی جەختیشی لە ئەرك و پێگەی ڕاستەقینەی پارلەمان لە ژیانی گەلی كوردستان كردەوە و، پەیوەست بە پڕۆسەی سیاسیی هەرێمی كوردستانیش سازدانی هەڵبژاردنی بە باشترین ڕێگەچارە بۆ ڕاستكردنەوەی پڕۆسەی سیاسیی هەرێم لە قەڵەم دا.
هەر لەو كۆبوونەویەدا ئامادەبووان لەبارەی بار و گوزەرانی خەڵك و پێشمەرگە و پڕۆسەی سیاسیی هەرێم، پێشنیاز و پرسیاریان ئاراستەی سەرۆك بارزانی كرد و سەرۆك بارزانییش ئامۆژگاری و ڕێنوێنیی پێویستی بۆ فراكسیۆنی پارتی دیموكراتی كوردستان خستە ڕوو.
