وەزیرە دەستلەكاركێشاوەكانی گۆران مانگانە موچەی خۆیان و پاسەوانەكانیان وەردەگرن
بەشێك لە وەزیرەكانی گۆڕان و كۆمەڵ و یەكگرتووی ئیسلامی، وێڕای دەست لەكاركێشانەوەیان لە حكومەتی هەرێم، بەڵام تا ئێستاش مووچەی خۆیان و پاسەوانەكانیان لە حكومەت وەردەگرن، وەزیری دەست لەكار كێشاوەی وەزارەتی بازرگانی و پیشەسازی و بەڕێوەبەری گشتی دیوانی هەمان وەزارەت كە هەر دووكیان سەر بە بزووتنەوەی گۆڕانن وێڕای وەرگرتنی مووچەی خۆیان و 3 پاسەوانی وەزیر هاوكات تا ئێستاش سێ تۆمبێل و خانوویەكی حكومەت كە نرخەكەی بە 500 ھەزار دۆلار دەخەمڵێنرێت لایان ماوە‌تەوە و رادەستی حكومەتی هەرێمیان نەكردووەتەوە.
عەبدولرەزاق عوسمان، بەڕێوەبەری گشتی دیوانی وەزارەتی بازرگانی و پیشەسازی بە وەكالەت رایگەیاند: “وەزیری پیشەسازی خۆی و پاسەوانەكانی تاكو ئێستا مووچە وەردەگرن، جگە لەویش بەڕێوەبەری گشتی دیوان ھێشتا مووچە وەردەگرێت و ئۆتۆمبێل و خانووی حكومەتی لاماوە كە بۆی دابین كرابوو و بۆ حكومەتی نەگەڕاندووەتەوە”.
لای خۆیەوە (عومەر كۆچەر) سەرۆكی لیژنەی دەستپاكی لە پەرلەمانی كوردستان دەڵێت: “ئەم بابەتە جێی پرسیارە، پێویستە ھەرچی زووە حكومەت دەست لەكاركێشانەوەیان قبووڵ بكات و ئیمتیازات لەو كەسانە وەربگرێتەوە كە دەستیان لەكاركێشاوەتەوە”.
