مه‌سرور بارزانی: به‌غدا خۆیده‌دزێته‌وه له جێبه‌جێ كردنی ده‌ستوور
لە دیداریدا لەگەڵ باڵیۆزی نەرویج لە ئوردن و عێراق، مەسروور بارزانی جەختی کردەوە لەوەی، کە هەرێمی کوردستان ئەرکە دەستوورییەکانی جێبەجێ کردووە، بەڵام لە بەغدا خۆدزینەوە لە جێبەجێکردنی کۆی دەستوور، وەک یەک پەکێج هەیە.
ئەمڕۆ 5/3/2018، مەسروور بارزانی راوێژکاری ئەنجوومەنی ئاسایشی هەرێمی کوردستان، پێشوازیی لە خاتوو تۆن ئالەرس باڵیۆزی نوێی نەرویجی بۆ ئوردن و عێراق کرد.
لەم دیدارەدا باڵیۆزی نەرویج سوپاس و پێزانینی وڵاتەکەی بۆ هەرێمی کوردستان و قوربانیدانی هێزی پێشمەرگە لە جەنگی دژ بە تیرۆر ڕاگەیاند و، ئاماژەی بە ئەوە دا کە نەرویج بە بایەخەوە دەڕوانێتە ڕۆڵی هەرێم لە ناوچەکەدا و خوازیاری فراوانترکردنی زیاتری پەیوەندیی دوولایەنە لەگەڵ هەرێمی کوردستاندا.
باڵیۆزی نەرویج هاوکات پشتگیریی وڵاتەکەی بۆ دانوستانی نێوان هەولێر و بەغدا دووپات کردوە و، ئاواتی خواست هەرچیی زووتر ئەم دانوستانانە ئەنجامی ئەرێنیی لێ بکەوێتەوە.
لای خۆیەوە، راوێژکاری ئەنجوومەنی ئاسایشی هەرێمی کوردستان ئاواتی سەرکەوتنی بۆ خاتوو ئالەرس لە پۆستە نوێیەکەیدا خواست و، ستایشی وڵاتی نەرویجی کرد بۆ ئەو پاڵپشتی و هاوکاریانەی کە لە چوارچێوەی هاپەیمانیی نێودەوڵەتی دژ بە داعشدا پێشکەشی هەرێمی کوردستانیان کردووە.
مەسروور بارزانی لە بارەی دواڕەوشی عێراق و ناوچەکە ڕایگەیاند، دەبێت کۆمەڵگای نێودەوڵەتی کاراتر ئەرکەکانی لە ناوچەکەدا جێبەجێ بکات تاکو زەمینە بۆ سەرهەڵدانی توندوتیژی و گەشەکردنەوەی تیرۆر نەرەخسێتەوە.
لە بارەی پەیوەندییەکانی هەولێر و بەغدایشەوە، راوێژکاری ئەنجوومەنی ئاسایشی هەرێم جەختی لەسەر دانوستانەکان لەسەر بنەمای جێبەجێکردنی دەستوور کردەوە و ڕوونی کردەوە، هەرێمی کوردستان ئەرکە دەستوورییەکانی جێبەجێ کردووە، بەڵام لە بەغدا خۆدزینەوە لە جێبەجێکردنی کۆی دەستوور، وەک یەک پەکێج هەیە.
