نوێنەری حكوومەتی هەرێم لە واشنتۆن بەشداری كۆنگرەیەك لەبارەی عێراق دەكات
ئەمڕۆ سێشەممە بەیان سامی عەبدورەحمان نوێنەری حكومەتی هەرێمی كوردستان لە واشنتۆن بەشداری لە كۆنگرەیەكی تایبەت بە عێراق كرد و لە میانی وتارێكیدا رەخنەی لە بانگەشەكانی پێكهێنانی حكوومەتی زۆرینە لە عێراق گرت.
بەیان سامی عەبدورەحمان ڕەخنەی لەو ئاراستە نوێیە كرد كە چەند لایەنێكی سیاسیی عێراقی دەیانەوێ لە دوای هەڵبژاردنی مانگی ئایاری داهاتوودا، حكوومەتێكی زۆرینەی سیاسی پێكبێنن و چیتر كار بە حكوومەتی تەوافوقی نەكرێت. لەمبارەیەوە داواشی كرد لە حكوومەتی داهاتوودا بەشداری بە هەموو پێكهاتەكانی عێراق بكرێت، دەنا عێراق بەرەو دواوە دەگەڕێتەوە.
نوێنەری حكوومەتی هەرێمی كوردستان لە ئەمریكا، لە میانی وتارەكەیدا داواشی كرد لەمەودوا ناوچە كوردستانیەكانی دەرەوەی ئیدارەی هەرێمی كوردستان بە هاوبەشی لەلایەن بەغدا و حكوومەتی هەرێمی كوردستانەوە بەڕێوەببرێن.
جێی باسە ئێستە بەفەرمی لیستی دەوڵەتی یاسا بەسەرۆكایەتی نوری مالیكی جێگری سەركۆماری عێراق داوای پێكهێنانی حكوومەتێكی زۆرینە دەكات لەبیری حكوومەتی تەوافوقی.
