د.عەلی دولەمەری: فرەنسا سەقامگیریا رۆژهەلاتا ناڤین ب سەقامیگریا کوردستانێ دبینیت
لدووڤ روودانێن 16 ئێکتوبەرا 2017ێ، حکومەتا عیراقێ رابوو ب دوورپێچکرنا هەرێما کوردستانێ ژلایێ لەشکەری و ئابۆری ڤە، بەلێ لگۆر ڤشارا چەندین وەلاتێن زێلهێز حکومەتا عیراقێ هەلویستێ خۆ بەرامبەر هەرێما کوردستانێ گهوری و ئێکەم پێنگاڤ ڤرۆکخانەیێن هەرێمێ ڤەکرن.
د.عەلی دولەمەری، نوونەرێ حکومەتا هەرێما کوردستانێ ل فرەنسا، گۆت:” پشتی حکومەتا عیراقێ رابوویی ب ئابلوقکرنا هەرێما کوردستانێ ژ روویێ ئابۆری و سیاسی و دبلوماسی، حکومەتا هەرێمێ داخوازا کر کیشەیێن دناڤبەرا هەر دوو حکومەتاندا ب رێکا دستوری چارەسەر بکن، ژبەر هندێ وەلاتێن ئورۆپی وەک فرەنسا و ئەلمانیا پێشخەر بووینە کۆ هاریکاریا هەرێما کوردستانێ بکەن و فشارێ بێخنە لسەر حکومەتا عیراقێ بۆ بجهئینانا دستوری، جونکی سەقامگیریا عیراقێ نائیتە بجهئینان بیێ سەقامگێریا هەرێما کوردستانێ و ئەڤ هەولە وەلاتێن ئۆروپی ئەنجامدان داکو مافێن کوردا نەئێنە بەرزەکرن”.
نوونەرێ حکومەتا هەرێما کوردستانێ ل فرەنسا زەلالکر:” عیراق لسەر بنەمایێ حکومەتا هەڤپشک بهێتە ئاڤکرن، ژبەر ڤێ ئێکێ وەلاتێن ئورۆپی و ب تایبەت حکومەتا فرەنسا فشار ئێخستە سەر حکومەتا عیراقێ سەرپێچیا دستور نەکەت و ئێکەم پێنگاڤ ڤرۆکخانەیێن هەرێما کوردستانێ هاتنە ڤەکرن”.
عەلی دولەمەری خویاکر:” دڤێت ژبیر نەکەین دەمێ هەرێما کوردستانێ هاتیە دامەزراندن لسەر بریارا جڤاتا ئاسایشا نەتەوەیی ب پێشتەڤانیا فرەنسا بوو و پاراستنا هەرێما کوردستانێ گەلەک گرنکە بۆ فرەنسا، ژبەر پێشمەرگەێ کوردستانێ شیا هێرشێن داعشێ تێکبشکینیت پشتی داعش چەندین هێرش کرینە سەر وەلاتێ فرەنسا و بوویە مەترسی لسەر ئێمناهیا وێ، دیسان فرەنسا ب ئەرکێ خو دزانیت پێشتەڤانیا هەر چوار پارچەیێن کوردستانێ دکەت”.
نوونەرێ حکومەتا هەرێما کوردستانێ ل فرەنسا بەحسکر، فرەنسا دزانیت حکومەتا عیراقێ سەقامگیریێ ل رۆژهەلاتا ناڤین پەیدا ناکەت، ژبەر هندێ عیراق و سوریا گەلەک دگرنگن بۆ وەلاتێن ئۆروپی ب تایبەت پشتی داعشێ هێرشکرینە وەلاتێن ئورۆپی و تا ئەڤ وەلاتە سەقامگیر نەبن دێ مەترسی لسەر وەلاتێن ئورۆپا هەبیت و نوکە سەقامگیریا عیراق ب ساناهیترە ژ سوریا، جونکی عیراق خودان دستورە و مافێن هەمی پێکهاتەیێن عیراقێ تێدا بەحسکرینە، ل داهاتی دێ سەقامگیریا ڤان دەڤەران ئێتەکرن ب تایبەت ژروویێ ئیمناهیا جڤاتا دەولی و پەنابەر و ئاواراندا”.
