حاكم قادر : دەنگم بەئاشکرا بەڵێ بووە لەپرۆسەی ڕیفراندۆمدا
حاکم قادر حەمەجان، ئەندامی مەکتەبی سیاسیی یەکێتی لە هه‌ژماری تایبەتی خۆی لە تۆڕی کۆمەڵایەتیی (فەیسبووک) له‌ژێر ناونیشانی ( لەحاکم قادرەوە بۆ جەماوەری بەئاگای گەلەکەمان بەگشتی وڕۆشنبیران وئەھلی قەڵەم وخوێنەران وچاودێرانی بڵاوکراوە وسایت وڕۆژنامە ئەلیکترۆنییەکان (سۆشیال میدیا) بەتایبەتی ) نوسیویه‌تی و ده‌ڵێت: ”لە چەند سایتێکی نامەسئولدا ھەواڵێکی درۆ ئامێزو نابەجێان بەناوی بەندەوە لەبارەی کەیسی شێوازی پاشەکشەی ھێزەکانی پێشمەرگە لەکەرکوک وڕووداوە نەخوازراوەکانی پاشکۆی ئەو پاشەکشەیە لەشاری دوز خورماتوو“ بڵاو کراوەتەوە.
ئەو ئەندامەی مەکتەبی سیاسیی یەکێتی ده‌شڵێت:” بەدڵنیاییەوە بەندە بۆ ھەر پرۆسەیەک کەلەقازانج وبۆ سەرخستنی دۆزی ڕەوای گەلەکەمان بێت , لەلایەن ھەر کەس ولایەنێکەوە لەداھاتوودا سەرپەرشتی کرابێت و بۆ ئایندەش بکرێت بێ دوودڵی پشتگیری وپشتیوانی دەکەم , بەتایبەت ڕیفراندۆم کەمافێکی ڕەواو یاسایی ومرۆیی ھەموو گەلێکە”.
هه‌روه‌ها حاكم قادر حه‌مه جان له پۆسته‌كه‌یدا له هه‌ژماری تایبه‌تی خۆی نوسیویه‌تی “گەلی کوردیش مافی خۆیەتی بڕیار لەسەر چارەنووسی خۆی بدات , بەندەش بەباوەڕی تەواوە بۆ بەدەستھێنانی مافی چارەنووسی گەلی کورد خەباتی نەپساوەم بۆکردووەو دەنگیشم بەئاشکرا بەڵێ بووە لەپرۆسەی دەنگداندا .
له كۆتایی پۆسته‌كه‌یدا (حاكم قادر ) ده‌لێت : سەرلەبەری ئەو ھەواڵە درۆی شاخدارو چەواشەکاری وبوختان ھەڵبەستن زیاتر ھیچی تر نییە،ئومێدەوارم ڕەچاوی نەریتە ڕاستگۆییەکان وبەھا پیرۆزەکانی ڕێزگرتن بکەن .
