ئه‌مریكا هۆشداری دایه توركیا, سیسته‌می به‌رگری ئێس 400 بكڕێت سزا ده‌درێت
دوای ئه‌وه‌ی توركیا عه‌فرین و به‌شێكی خاكی رۆژئاوای كوردستانی داگیركرد, ئێستا له‌و ناوچانه رووبه‌رووی ره‌وشێكی مرۆیی خراپ بوونه‌ته‌وه, ئه‌مریكا ده‌لێت هۆشداری ده‌ده‌ینه توركیا له سه‌ركێشی و ئه‌و مه‌ترسییانه‌ی به هۆی هاوكاری له‌گه‌ڵ رووسیا له سووریا دێنه ئاراوه.
ویس مێچیڵ، یاریده‌ده‌ری وه‌زیری ده‌ره‌وه‌ی ئه‌مریكا، بۆ كاروباری ئه‌وروپا و ئاسیا، له میانی دانیشتنی لیژنه‌ی كاروباری ده‌ره‌وه‌ی ئه‌نجوومه‌نی نوێنه‌ران تایبه‌ت به سیاسه‌تی ئه‌مریكا له خۆرهه‌ڵاتی ناوه‌ڕاست، رایگه‌یاند، “پێویسته توركیا مه‌ترسی ئه‌و سازشه ستراتیژیانه‌ی له‌به‌ر چاو بێت كه له به‌رامبه‌ر رووسیا ده‌یانكات له پێناو به‌ده‌ستهێنانی ئامانجی تاكتیكی له سووریا”.
جه‌ختیشی له‌سه‌ر ئه‌وه كرده‌وه، كه ئه‌گه‌ر “توركیا سیستمی به‌رگری مووشه‌كی ئێس-400 بكڕێت، ئه‌وا؛ ئه‌مریكا سزای به‌سه‌ردا ده‌سه‌پێنێت، به گوێره‌ی یاسای به‌ره‌نگاربوونه‌وه‌ی دوژمنانی ئه‌مریكا و ئه‌وه‌ش كاریگه‌ری نه‌رێنی ده‌كاته سه‌ر پرسی پێدانی فڕۆكه‌ی نوێی ئێف 35ی ئه‌مریكی”.
سه‌رچاوه: رووسیالیه‌وم
