سۆران سێوەکانی: حاڵی کۆمەڵی ئیسلامی گەلێک ئیحراجە
سۆران سێوكانی چاودێری سیاسی و توێژه‌ر له بواری ئیسلامی سیاسی لە هەژماری خۆیدا لە تۆڕی كۆمەڵایەتیی (فەیسبوك) بابەتێكی بەنێوی (کۆمەڵی ئیسلامی و ترسەکانی هەڵبژاردن) بڵاوکردووەتەوەو تییدا نوسیوویەتێ و دەڵیت: “پێموایە حاڵی کۆمەڵی ئیسلامی لەم هەڵبژاردنەدا گەلێک ئیحراجە، لە لایەکەوە لیستی ئیسلامی کە یەکگرتوو ئەندازیاریەتی، گورزێکی گورچکبڕە لە کۆمەڵ لە ناوەندە ئاییندارە تەقلیدیەکەدا، جیابوونەوەی ئارام قادر و کۆنە نەهزەکانیش جارێکی تر گورزێکی ترە لەلایەن ئیسلامیە سیاسییەکان و ئاگادارەکان”.
سەبارەت بە پاشکۆیەتی کۆمەڵی ئیسلامی بۆ بزوتنەوەی گۆران (سۆران سێوەکانی) نوسیویەتی : ” گۆڕان بووەتە سیمبولی ئەو پرسە و کەس ئاوڕ لە کۆمەڵ ناداتەوە، گرفتی سەرەکی کۆمەڵ ئەوەیە کە وەك پاشکۆیەکی گۆڕان ناسراوە، ئەوەش زەبرێکی ترە بەریدەکەوێت، چونكە گۆڕان هەبێت، کۆمەڵ زیادەیە”.
لەکۆتایی نوسینەکەیدا (سیوەکانی ) نوسیویەتی :” “لەمانەش گرنگتر، کاندیدەکانی یەکگرتوون لە هەولێر، كە حاجی کاروان و مەلا شێرزادن، کە دەنگی ژنانی ماڵەوەی ئاییندار دەبەن، پێشتر هێزی کۆمەڵ لە هەولێردا بوو، ئەم جارە پێدەچێت ئەوێشی لەدەست دابێت، خورافەتی پیاوە مەردەکەش، تەنیا گەمژاندنێکە لە گۆڕانەوە بەرامبەر کۆمەڵ”.
