نێچیرڤان بارزانی: دەبێ دەستبەجێ له سلێمانى هێرش و ئاڵۆزی ڕابگیرێن
بەڕێز نێچیرڤان بارزانی، سەرۆك وەزیرانی هەرێمی كوردستان، لە پەیامێكدا داوا دەكات هێرشكردنە سەر مەكۆی سەرەكيی گۆڕان له سلێمانى ڕابگیرێت.
ئەمە دەقی پەیامەكەیە:
زۆر دڵتەنگین بەرامبەر تێكدانی ئاراميی شاری سلێمانی، بۆ ئەو مەبەستە داوا دەكەین دەستبەجێ تەقەكردن لە بارەگای حیزبەكان لە سلێمانی ڕابگیرێت و هێزە ئەمنییەكان بەرپرسیارێتيی خۆیان ئەنجام بدەن و بارەگا و بنكەی هەموو لایەنەكان بپارێزن.
هەموو لایەنەكان پێویستە دان بەخۆیاندا بگرن و لە ڕێگەی یاسایييه‌وه سكاڵاكانیان بگەیه‌ننە كۆمسیۆنی سەربەخۆی هەڵبژاردنەكانی عێراق لەسەر هەر گومانێك كە لە ئەنجامەكانی هەڵبژاردن هەیانە و بە هەموو شێوەیەك ڕەچاوی هێمنی و ئاسایشی كۆمەڵایەتيی خەڵكی سلێمانی بكەن.
نێچیرڤان بارزانی
سەرۆك وەزیرانی هەرێمی كوردستان
12/5/2018
