نێچیرڤان بارزانی: ناوی هه‌ولێر و دهۆك له بابه‌تی ساخته‌كاری ته‌واوكردنی شیعره‌كه‌یه، ئێمه ئاماده‌ین بۆ هه‌ژماری ده‌نگه‌كان به‌ده‌ست له‌هه‌ولێر و دهۆك
سه‌رۆك وه‌زیرانی هه‌رێمی كوردستان نێچیرڤان بارزانی له‌كۆنگره‌یه‌كی رۆژنامه‌وانی هه‌فتانه‌ی خۆی دا رایگه‌یاند” وه‌كو لایه‌نی كوردی له‌و گفتوگۆیانه به‌شدار ده‌بن كه بۆ پێكهێنانی حكوومه‌تی نوێ ده‌كرێت، هه‌روه‌ها سوپاسی كۆمیسیۆنی باڵای سه‌ربه‌خۆی هه‌ڵبژاردنه‌كان و جه‌ماوه‌ری كوردستانیش كرد بۆ ئه‌و به‌شدارییه‌ی له پرۆسه‌كه‌دا كردیان، كه له‌چاو ناوچه‌كانی دیكه‌ی عێراق به‌رزبوو”.
هه‌روه‌ها نێچیرڤان بارزانی روونیشی كرده‌وه، هه‌رێمی كوردستان ده‌یه‌وێت له رێگه‌ی ته‌وافوق و هاوبه‌شی بچێته به‌غدا و بۆ چاره‌سه‌ری كێشه‌كان رێكبكه‌ون، دووپاتیشی كرده‌وه، كورد ده‌بێت به یه‌كگرتوویی و یه‌كڕیزی بچێته به‌غدا، له باره‌ی به‌شداریكردن له هاوپه‌یمانی نوێ بۆ پێكهینانی حكوومه‌ت، رایگه‌یاند، هێشتا نه‌چوونه‌ته ناو هیچ گفتوگۆیه‌ك، به‌ڵام له‌ماوه‌یه‌كی نزیك وه‌فدیان ده‌چێته به‌غدا و له‌گه‌ڵ هه‌موو لایه‌نه‌كان گفتوگۆ ده‌كه‌ن.
نێچیرڤان بارزانی، له وه‌ڵامی پرسیاری په‌یامنێری كوردستان 24، له باره‌ی نیگه‌رانی شه‌ش لایه‌نه‌كه له پرۆسه‌ی هه‌ڵبژاردن، رایگه‌یاند، ئه‌و شه‌ش لایه‌نه بۆ ئه‌وه‌ی “قافیه‌ی شیعره‌كه‌یان ته‌واو بێت” هه‌ولێر و دهۆكیشیان تێكه‌ڵ كردووه، ئه‌گه‌رنا نیگه‌رانییه‌كانییان زیاتر له سلێمانی و كه‌ركووكه، روونیشی كرده‌وه، ئه‌وان نیگه‌رانن له پرۆسه‌كه و هه‌موو هه‌وڵێك ده‌ده‌ن بۆ ئه‌وه‌ی نیگه‌رانییه‌كان بڕه‌وێننه‌وه و بۆ ئه‌و مه‌به‌سته‌ش به هه‌موو شێوه‌یه‌ك ئاماده‌ن، داواش له كۆمیسیۆن ده‌كات بێنه سه‌ر خه‌ت.
سه‌باره‌ت به سه‌ردانی برێت مه‌كگورك، نوێنه‌ری تایبه‌تی سه‌رۆكایه‌تی ئه‌مه‌ریكا له هاوپه‌یمانی نێوده‌وڵه‌تی دژی داعش نێچیرڤان بارزانی رایگه‌یاند، هه‌ست به‌وه نه‌كراوه ڤیتۆیان له‌سه‌ر هیچ كه‌س و لایه‌نێك هه‌بێت و هیچ لایه‌نێك به‌سه‌ر لایه‌نێكی دیكه فه‌رز ناكه‌ن و گوتی: “ئه‌وه‌ی من هه‌ستم كرد پێیانوایه پرۆسه‌كه ته‌واو عێراقییه”.
نێچیرڤان بارزانی دووپاتیشی كرده‌وه، داوای هه‌ڵبژاردنی داهاتووی كوردستانی كردووه، چ له‌سه‌ر سه‌رۆكایه‌تی هه‌رێم، یان په‌رله‌مان و ئه‌نجوومه‌نی پارێزگاكان، گوتیشی: “وه‌كو پارتیش هیچ گرفتێكمان له‌سه‌ر ئه‌و بابه‌ته نییه و ئاماده‌ییمان تێدایه، راشیگه‌یاند، وه‌كو پارتی كه‌م و زۆر ئه‌گه‌ر سه‌یری بكه‌ی، ده‌نگێكی خراپی نه‌هێناوه و هه‌موو حزبێكیش هه‌وڵده‌دات له‌وه زیاتری هه‌بێت، به‌ڵام ئه‌وه‌ی هه‌وڵدرا به‌سه‌ر پارتیدا بێت و ئه‌و ئه‌نجامه‌شی هێناوه، جێگه‌ی پێزانینه. هه‌روه‌ها سوپاسی ده‌نگده‌ر و جه‌ماوه‌ریشی كرد كه حزبه‌كه‌یان خۆیان جێنه‌هێشتووه و به هێزه‌وه ده‌گه‌ڕێنه‌وه مه‌یدانه‌كه.
نێچیرڤان بارزانی سه‌باره‌ت به‌پرۆسه‌ی هه‌ڵبژاردن له كه‌ركووك و سلێمانی و ناوچه‌كانی دیكه و نیگه‌رانییه‌كان، داوای له كۆمیسیۆن كرد بێته سه‌ر خه‌ت و نیگه‌رانییه‌كان بڕه‌وێنێته‌وه بۆ ئه‌وه‌ی هه‌موو هێزه‌كان پێگه‌ی راسته‌قینه‌ی خۆیان بزانن، هه‌روه‌ها گووتی: “نابێت خه‌ڵك وا هه‌ست بكات ده‌نگه‌كه‌ی لێبردراوه و كێشه‌ی بۆ درووست بێت، بێگومان نابێت شتی وا رووبدات، ئه‌و ده‌نگدانه‌ی ئێستاش ده‌بێته ئه‌زموون بۆ هه‌ڵبژاردنی هه‌رێمی كوردستان، نیگه‌رانی لایه‌نه‌كانیش نیگه‌رانی جددین و له كوردستان بوونیان هه‌یه و گوتی: “من نیگه‌رانییه‌كانم به جددی وه‌رگرتووه و داوا ده‌كه‌م كۆمیسیۆن رێكاری پێویست بگرێته‌به‌ر بۆ ره‌واندنه‌وه‌یان به تایبه‌تیش له‌و شوێنانه‌ی كه نیگه‌رانی زیاترییان هه‌یه”.
نێچیرڤان بارزانی، له باره‌ی نیگه‌رانییه‌كان له‌سه‌ر هه‌ڵبژاردن له هه‌ولێر و دهۆك رایگه‌یاند: “ئه‌وه‌ی ده‌یه‌وێت هه‌ژمار و جیاكردنه‌وه‌ی ده‌نگه‌كان به ده‌ست بكرێت ئاماده‌ن و گرفتییان نییه، به‌ڵام ئه‌وه كاری كۆمیسیۆنه نه‌ك حكوومه‌ت و ده‌بێت ئه‌وان بیكه‌ن، راشیگه‌یاند، هیچ لارییه‌ك نییه ئه‌گه‌ر هه‌ژمار و جیاكردنه‌وه‌ی ده‌نگه‌كان بكرێن، له باره‌ی حكوومه‌تی عێراقیش، رایگه‌یاند، كورد حه‌قی خۆیه‌تی پۆستی سه‌رۆك كۆمار وه‌ربگرێت له قۆناخی داهاتوو، به‌ڵام كێشه‌ی كورد له به‌غدا پۆست نییه، به‌ڵكو گه‌وره‌تره و 12 ساڵه چاوه‌ڕوانی جێبه‌جێكردنی ده‌ستووره، كه جێبه‌جێ ناكرێت، 12 ساڵه شه‌راكه‌ت پشتگوێ خراوه، 12 ساڵه هیچ شتێك بۆ سه‌قامگیری سیاسی له عێراق نه‌كراوه”.
هه‌روه‌ها نێچیرڤان بارزانی گوتیشی” پرسیاره‌كه ئه‌وه‌یه عێراق له‌سه‌ر شێوازی كۆن به‌ڕێوه‌ده‌برێت؟ كورد به‌ره‌و ریفراندۆم هه‌نگاوی نا، چونكه كورد بێ هیوا بوو له‌وه‌ی به‌غدا مافه‌كانی بدات و ده‌ستووره‌كه‌ی جێبه‌جێ بكات، بێگومان ئه‌گه‌ر هه‌ر به هه‌مان روئیای كۆن به‌ڕێوه‌ببردرێت، بێگومان هه‌مان شته‌كان دووباره ده‌بنه‌وه، ده‌شلێـ”مێژوو پێمان ده‌ڵێت ئه‌گه‌ر مافه‌كانی كورد جێبه‌جێ نه‌كرێت، بێگومان سه‌قامگیری نابێت”.
نێچیرڤان بارزانی ئه‌وه‌شی راگه‌یاند، له‌گه‌ڵ هه‌موو لایه‌نه كوردییه‌كان ده‌ست به گفتوگۆ ده‌كه‌ن و دواتریش له‌گه‌ڵ لایه‌نه‌كانی به‌غدا گفتوگۆ ده‌كه‌ن.
سه‌باره‌ت به بوونی كێشه‌ی كریستیانه‌كان و كوردانی شه‌به‌ك له ده‌شتی نه‌ینه‌وا نێچیرڤان بارزانی رایگه‌یاند، پێكهاته‌ی كریستیان وه‌كو ئایین، وه‌كو نه‌ته‌وه‌یی سریان و كلدان و ئاشووریی و ئه‌رمه‌نه‌كان، ریشه‌ی مێژوویی كۆنییان هه‌یه، وه‌كو مه‌بده‌ئیش هه‌ر هه‌نگاوێك بۆ پاراستنی ئه‌وان و دڵنیاییان له پاراستنییان مافی خۆیانه چ له‌لایه‌ن هه‌ولێر و چ له به‌غداش، ئاماده‌ن هه‌موو هه‌نگاوێك بگرنه‌به‌ر، دووپاتیشی كرده‌وه، ئه‌وانه هاووڵاتی ئه‌و وڵاته‌ن و ده‌یانه‌وێت ژیانیان پارێزراو بێت و له‌گه‌ڵ به‌غدا بۆ ئه‌و پرسه گفتوگۆ ده‌كه‌ن.
