پارتی دیموكراتی كوردستان داوای یه‌كگرتووی و یه‌كریزی ده‌كات
هه‌فته‌ی ڕابردوودا شاندێكی پارتی دیموكراتی كوردستان سه‌ردانی به‌غدای كرد و له‌گه‌ڵ لایه‌نه عێراقییه‌كان كۆ بویه‌وە و تێیدا باس له پێكهێنانی كابینه‌ی نوێی حكوومه‌تی عێراق كرا و شانده‌كه‌ی پارتی كۆتاییی به سه‌ردانه‌كه‌ی هێنا و گه‌ڕایه‌وه بۆ هه‌رێمی كوردستان .
شوان محه‌مه‌د ته‌ها، بەرپرسی لقی پارتی لە بەغداد ڕایگه‌یاند: “كۆبوونه‌وه‌كان به‌رده‌وام ده‌بن و ئێمه ده‌چینه‌وه بۆ به‌غدا و شاندی ئه‌وانیش سه‌ردانی هه‌رێمی كوردستان ده‌كه‌ن و چاوه‌ڕوان ده‌كرێت حه‌فته‌ی داهاتوو گفتوگۆكان گه‌رموگوڕتر ببن بۆ پێكهێنانی كابینه‌ی نوێی حكوومه‌تی عێراق، به‌ڵام بۆ دروستكردنی ڕایه‌كی كوردستانی پێویسته سه‌ركردایه‌تیی كورد بڕیاری له‌سه‌ر بدات.”
لای خۆشیه‌وه د. ئاراس حەسۆ میرخان ئه‌ندامی ئه‌نجومه‌نی سه‌ركردایه‌تیی پارتی دیموكراتی كوردستان گووتی: “دوای گه‌ڕانه‌وه‌ی شاندی پارتی دیموكراتی كوردستان له به‌غدا بڕیار دراوه كه پارتی دیموكراتی كوردستان و یه‌كێتیی نیشتمانیی كوردستان كۆ ببنه‌وه و گفتوگۆ بکەن له‌باره‌ی ئه‌وه‌ی کە به یه‌كه‌وه گفتوگۆ له‌باره‌ی پێكهێنانی كابینه‌ی نوێ له‌گه‌ڵ لایه‌نه عێراقییه‌كان بکەن و هه‌ردوو لاش یه‌كهه‌ڵوێست بن.”
سه‌باره‌ت به هێزو لایه‌نه‌كانی ترله كوردستان د.ئاراس حه‌سۆ میرخان گووتیشی:” ئه‌و لایه‌نانه هێشتا خۆیان یه‌كلایی نه‌كردووەته‌وه كه به‌شداری له پرۆسه‌ی سیاسیی عێراق ده‌كه‌ن، یان نا و هه‌ركاتێك خۆیان یه‌كلایی كرده‌وه، ئه‌وكات هه‌وڵ ده‌ده‌ن كه گفتوگۆ له‌گه‌ڵ ئه‌وانیش بكه‌ن، چونكه ئێمه ده‌مانه‌وێت هه‌موو لایه‌نه كوردستانییە‌كان به یه‌كهه‌ڵوێستی بچینه به‌غدا.”
