گوته‌بێژی پارتی :پێمان باشه به پێی رێكاره یاساییه‌كان ده‌نگه‌كان به ده‌ست بژمێردرێته‌وه
مەحموود محەمەد، گوتەبێژو ئەندامی مەکتەبی سیاسیی پارتی، سه‌باره‌ت به ھەڵوەشاندنەوەی دەرئەنجامی ھەڵبژاردنەکانی پەرلەمانی عێراق، ڕایگەیاند: ”ئەوانەی کە زیانیان پێ کەوتووە، یان دەرنەچوون، ئەم بابەتە زیاتر دەورژێنن، بەڵام ئەوەش ماوەتەوە سەر ئەو بڕیارانەی ئەنجومەنی نوێنەرانی عێراق کە تا چەند یاسایین؟ ئایا ئەوان دەسەڵاتی ئەوەیان ھەیە کە بڕیاری لەو جۆرە دەربکەن یان نا؟، ئەگەر بڕیاریان دەرکرد، ئایا حکوومەتی عێراقی پابەندە بە جێبەجێکردنیەوە؟ ئەوەش دەمێنێتەوە سەر ئەو کەسانەی شارەزای یاسان و بۆچوون لەسەر ئەم بابەتە دەرببڕن“.
گوته‌بێژی پارتی دیموكراتی كوردستان ڕاشیگه‌یاند : ئێمه‌ش تێبینییان لەسەر ھەندێک شوێن ھەیە، بەڵام ”بەو مانایە نییە کە کۆی پڕۆسەکە ڕەت بکەینەوە، بەڵکو ئەو گرفتانەی کە ھەیە، دەکرێ بەشێوازێک کە لایەنەکان گلەییان ھەیە لە شێوازی بەڕێوەچوونەکەی یان ھەر بابەتێکی دیکە، بڕوایان پێ بھێنرێ، چ بەشێوەی ژماردنەوەی دەستی بێ، یان بەشێوەی ڕێژەیی بۆ نموونە ھەتا زۆرینەش بکرێ کێشەی نییە“.
مه‌حمود محه‌مه‌د ئه‌ندامی سه‌ركردایه‌تی پارتی گوتی: ”ئێمە لەگەڵ ئەوەین، بە شێوەیەکی ڕێک و پێک بەرنامەکە بەڕێوە بچێت و لەو تەمومژاوییە بێتە دەرێ و شەفافییەت لە کارەکان ھەبێ کە ئەنجام دراوە“.
هه‌روه‌ها گوتیشی :” دەکرێ لە ھەر شوێنێک پێویست بێ، دەنگەکان بەدەست بژمێردرێتەوە، ھەروەھا لە ڕاگەیاندنی فەرمی مەکتەبی سیاسی پارتیش جەختیان لێ کردووەتەوە”.
