خەسرەو گۆران: هه‌وڵ ده‌ده‌ین له حكوومه‌تی داهاتووی عێراق پاشماوه‌كانی ئه‌و كاره‌ساته‌ی به‌سه‌ر كه‌ركووك و خورماتوو هاتووه بسڕینه‌وه
دوای كۆتا هاتنی هه‌ڵبژاردنه‌كانی عێراق ئه‌گه‌ر كورد به‌یه‌ك هاوپه‌یمانی بچێته به‌غدا ده‌بێته یه‌كێك له گه‌وره‌ترین لیسته‌كانی نێو په‌رله‌مانی عێراق ده‌رده‌كه‌وێت, به‌رپرسی ده‌زگای هه‌ڵبژاردنی پارتی دیموكراتی كوردستان، رای ده‌گه‌یه‌نێت، كورد وه‌كو نه‌وه‌ته‌ی دووه‌م به ژماره‌ی كورسییه‌كانی ناپێورێت، دەشڵێت ”ئه‌گه‌ر كورد به هاوپه‌یمانی نه‌چێته به‌غدا كێشه بنه‌ڕه‌تییه‌كان ون ده‌بن“.
خه‌سره‌و گۆران، به‌رپرسی ده‌زگای هه‌ڵبژاردنی پارتی دیموكراتی كوردستان رایگه‌یاند:” كورد له به‌غدا به ژماره‌ی كورسییه‌كانی ناپێورێت، به‌ڵكو ده‌بێت وه‌كو نه‌ته‌وه‌یی دووه‌م و شه‌رێكێكی بنه‌ڕه‌تی له پڕۆسه‌ی سیاسی و دیموكراسی حسابی بۆ بكرێت.
به‌رپرسی ده‌زگای هه‌ڵبژاردنی پارتی دیموكراتی كوردستان، ئەوەشی خستە روو، کە راسته ژماره‌ی كورسی گرنگه و قه‌باره‌ی سیاسی دیاری ده‌كات، به‌ڵام له‌وه گرنگتر ئه‌وه‌یه كه هێزه سیاسییه‌كان پێكه‌وه بچنه به‌غدا، ئه‌گه‌ر هه‌ركه‌سه و به‌ته‌نیا بچێت، كێشه بنه‌ڕه‌تییه‌كه ون ده‌بێت، له‌به‌ر ئه‌وه‌ی كورد له پێكهێنانی حكوومه‌تی نوێی عێراق تا ساڵی 2010 به‌شێوه‌یه‌كی یه‌كڕیز و چووینه به‌غدا، هاوپه‌یمانییه‌كه‌مان كاریگه‌ری خۆی هه‌بوو.
ئاشکراشی کرد، كه چوونی كورد بۆ به‌غدا و به‌شداریكردنی له حكوومه‌تی نوێدا بۆ جێبه‌جێكردنی مافه ده‌ستورییه‌كان بووه كه عێراقی نوێی له‌سه‌ر بنیاتنراوه، پێشتریش كه به‌رده‌وام له شۆڕش و راپه‌ڕیندا بووه له‌به‌ر ئه‌وه بووه مافه ده‌ستورییه‌كانی به یاسا پێ نه‌درابوو.
له‌باره‌ی نزیكی كورد له‌و لایه‌نانه‌ی كه حكوومه‌ت پێك ده‌هێنن، خه‌سره‌و گۆران، به‌رپرسی ده‌زگای هه‌ڵبژاردنی پارتی، باسی له‌وه‌كرد كه راسته هه‌ندێ له‌وانه‌ی كه حكوومه‌تی نوێی عێراق پێك ده‌هێنن دۆستی دێرینی کوردن و هاوخه‌بات بوون، گوتیشی: ”به‌ڵام ئه‌وه دۆخێك بووه و ئێستاش دۆخێكی دیكه‌یه، ئه‌وه‌ی ئێستا به‌ڵای ئێمه گرنگه چاره‌سه‌ركردنی كێشه هه‌ڵپه‌سێردراوه‌كانی وه‌كو ئاینده‌ی ناوچه كوردستانییه‌كانی ده‌ره‌وه‌ی ئیدارەی هه‌رێمی کوردستان، پێشمه‌رگه، پرسی نه‌وت، ده‌روازه سنوورییه‌كان بودجه‌ی هه‌رێمی كوردستان، ئامار“.
له‌باره‌ی ئه‌وه‌ی چ گه‌ره‌نتییه‌ك هه‌یه بۆ پاراستنی مافه‌كانی كورد له حكوومه‌تی داهاتووی عێراق، ئه‌ندامه‌كه‌ی شاندی پارتی رونی كرده‌وه، كه حكوومه‌تی رابردووش له هه‌ولێر پێكهێنراوه و رێككه‌وتنێكی 19 خاڵی واژۆ كرا، به‌ڵام هیچی جێبه‌جێ نه‌كرا، ئه‌مجاره جگه له نووسینه‌وه‌ی به‌رنامه‌ی حكوومه‌ت، سه‌قفێكی زه‌مه‌نی بۆ جێبه‌جێكردنی داده‌نرێت”.
جەختی لەوەش کردەوە، کە تاكو ئێستا دیار نییه حكوومه‌تی داهاتوو چۆن ده‌بێت، بنكه فراوان ده‌بێت وه‌كو پێشتر، یان به‌شێوازیی دیكه ده‌بێت و به‌شێك حكومرانی ده‌كه‌ن و به‌شێك ده‌بنه ئۆپۆزسیۆن، دەشڵێت: “به‌ڵام رێكخستنه‌وه‌ی ناو ماڵی كوردی و پاشان چوونی به‌یه‌ك تیم بۆ به‌غدا و به‌شداریكردن له پێكهێنانی حكوومه‌تی نوێی عێراق هه‌نگاوێكی گرنگه، چونكه له‌و رێگه‌یه‌وه، ده‌توانین شه‌ڕی ده‌ستووری خۆمان بكه‌ین”.
به‌رپرسی ده‌زگای هه‌ڵبژاردنی پارتی دیموكراتی كوردستان: ”گوتیشی ئێمه هه‌وڵ ده‌ده‌ین له حكوومه‌تی داهاتووی عێراق پاشماوه‌كانی ئه‌و كاره‌ساته‌ی به‌سه‌ر كه‌ركووك و خورماتوو هاتووه بسڕینه‌وه، متمانه‌ی هاووڵاتیانی خۆمان وه‌ربگرینه‌وه و ئاواره‌كان بگه‌رێنینه‌وه و ماده‌ی 140 جێبه‌جێ بكه‌ین“.
