سه‌رۆك بارزانی بۆ یان كۆبیج:هه‌ڵوه‌شاندنه‌وه‌ی ده‌نگی پێشمه‌رگه به‌هیچ شێوه‌یه‌ك قبوڵ ناكه‌ین
ماڵپه‌ری تایبه‌تی سه‌رۆك بارزانی ئەمڕۆ سێشەممە 12\6\2018 رایگه‌یاند سەرۆک بارزانی، لە سەلاحەدین لەگەڵ یان كۆبیج، نێردەی تایبەتی سكرتێری ڕێكخراوی نەتەوە یەكگرتووەكان لە عێراق کۆبوویەوە، لە دیدارەكەدا دوایین گوڕانكارییە سیاسییەكانی عێراق و بارودۆخی سیاسیی دوای هەڵبژاردن تاوتوێ كرا و بیروڕا لەبارەی پێشهاتەكان و گفتوگۆكانی پێكهێنانی حكوومەت و بڕیارەكانی پەرلەمان لەبارەی ئەنجامی هەڵبژاردن تاوتوێ كرا و نێردەی تایبەتی سكرتێری نەتەوە یەكگرتووەكان لە عێراقیش سەرۆك بارزانی، لەبارەی بۆچوونی کۆمەڵگەی نێودەوڵەتی و وڵاتانی زلهێز لەبارەی پڕۆسەی سیاسیی عێراق و هاوكێشەكانی دوای هەڵبژاردن ئاگادار كردەوە و ڕوانگەی ڕێكخراوی نەتەوە یەكگرتووەكانیشی لەبارەی نیگەرانییەكان لەسەر ئاییندەی عێراق و قۆناغی دوای هەڵبژاردن شی كردەوە،ئەوەیشی خستەڕوو كە ڕێكخراوی نەتەوەی یەكگرتووەكان ئامادەی تەواوی هەیە بۆ یارمەتیدانی پڕۆسەی سیاسیی عێراق و هەروەها چارەسەركردنی ئەو گرفتانەی كە لەنێوان هەرێم و بەغدادا هەن و هەروەها ناوچەكانی ماددەی 140.
هه‌ر له هه‌واڵه‌كه‌ی ماڵپه‌ری تایبه‌تی سه‌رۆك بارزانی دا هاتووه”هەر لەو كۆبوونەوەیەدا سەرۆك بارزانی، وێڕای ئاماژەدان بە قۆناغی پێش ڕیفراندۆم و ڕووداوەكانی 16ـی ئۆكتۆبەری ڕابردوو جەختی لەوە كردەوە كە ئێستا هەڵبژاردن كراوە و دۆخێكی نوێ هاتووەتە ئاراوە و ئەوەی بۆ گەلی كوردستان بایەخی سەرەكی هەیە ڕەچاوكردن و پابەندبوونە بە سێ پڕەنسیپی هاوبەشی و تەوافوق و هاوسەنگی لە هەموو بوارەكانی حوكمرانی و دانانی میكانیزم و جێبەجێكردنی وردەكارییەكانی ئەو سێ پڕەنسیپەیە و لە ژێر ڕۆشنایی ئەو سێ پڕەنسیپەش پێویستە هاوپەیمانێتی نێوان لایەنەكان بكرێت و ڕێككەوتن لەسەر پۆست و سیمای حكوومەتی ئاییندەی عێراق بكرێت.
هه‌روه‌ها ئه‌وه‌شی ئاشكرا كردووه كه لەبەشێكی تری وتەكانیدا سەرۆك بارزانی، تێبینیەكانی خۆی لەسەر كاركردی كۆمیسیۆن و بەڕێوەبردنی هەڵبژاردن و ئەنجامەكانی و هەروەها بڕیارەكانی ئەم دواییەی پارلەمان خستەڕوو و هێمایشی بەوەدا كە پارتی دیموكراتی كوردستان هیچ نوێنەرێكی لە كۆمیسیۆن نەبووە و بۆ ئەوەی پارتی نەبێتە حزبی یەكەم لە پارێزگای نەینەوا بە زوڵم دەنگی كەمپەكان و خوشك و برا ئێزیدییەكانیان سووتاند كە لە ڕاستیشدا پارتی حزبی یەكەم و براوەی پارێزگای نەینەوایە.
له‌هه‌واڵه‌كه‌ی ماڵپه‌ری تایبه‌تی سه‌رۆك بارزانی دا هاتووه” لەبارەی پڕۆسەی هەڵبژاردن و ساختەكاریش ڕایگەیاند كە ئێمە بە هەموو جۆرە ڕێكارێك ڕازیین كە ئەنجام بدرێت بە دووبارەكردنەوەی هەڵبژاردنەكانیش یان بەدواداچوون بۆ سكاڵاكان لە هەر شوێنێك بێت، بەڵام بڕیاری هەڵوەشاندنەوەی دەنگی پێشمەرگە بە بێ هۆ و لەپێناو مەرامی سیاسی زوڵمێكی زۆر گەورەیە و بە هیچ شێوەیەك قبوڵی ناكەین. چونكە ئەوە ئاماژە و هێمای زۆر خراپە و بە مانای كاركردنە بۆ هەڵوەشاندنەوەی هەرێمی كوردستان.
سەرۆك بارزانی پێشوازیشی لە ڕۆڵی ڕێكخراوی نەتەوە یەكگرتووەكان كرد بۆ یارمەتیدانی لایەنەكانی عێراق و چارەسەركردنی كێشەكان بە تایبەت لە بابەتی ماددەی 140 و ناوچە كوردستانییەكانی دەرەوەی ئیدارەی هەرێم و ئەوەیشی دووپاتكردەوە سەپاندنی ئەمری واقع و بەردەوامبوون لەو دۆخەی كە لەدوای 16ـی ئۆكتۆبەر قابیلی قبوڵ نییە و پێویستە لە چوارچێوەی مادەی 140ـی دەستوور یەكلایی ببێتەوە.
