قوباد تاڵه‌بانی ته‌واوی خانوو دوكانه‌كانی قه‌زای دوكان تاپۆده‌كات
جێگری سەرۆكی حكومەتی ھەرێمی كوردستان چەند بریارێكی گرنگی لە بەرژەوەندی ھاوڵاتیانی سنوری قەزای دوكان دەركرد و فەرمانیكردوە بەجێبەجێكردنیان.
فه‌رمانه‌كه‌ی قوباد تاڵەبانی جێگری سه‌رۆكی حكومه‌تی هه‌رێمی كوردستان به ژماره (٢٧١١ و ٢٧١٢ ڕۆژی ١١ـی حوزەیرانـی ،٢٠١٨ دەركراوە كە ژمارەیەك بڕیاری لەخۆگرتووەو جەختكراوەتەوە لەسەرئەوەی، “خانوە بێ تاپۆكانی ناو نەخشەی بنەڕەتی سنوری شارەوانی دوكان تاپۆ دەكرێن، ھەروەھا ئەو دوكانانەی لەساڵانی ڕابردودا دروستكرابوون و بەناوی شارەوانیەوە مابون تاپۆدەكرێن”.
ئەمەی خوارەوە تەواوی بڕیارەكانە…
یەكـــەم/ خانوە بێ تاپۆكانی ناو نەخشەی بنەڕەتی سنوری شارەوانی دوكـــان تاپـــــــــــۆ دەكرێن.
دووەم / ئەو دوكانانەی لە ساڵانی ڕابردوودا لە سنوری شارەوانی دوكان دروست كراون بەناوی شارەوانیەو مابوون تاپـــــــۆدەكرێن.
سێیەم / ئەوزەویانەی كەبەتاڵن لە سنوری شارەوانی دان لە نێوان خانوو و كەلاوەكاندان بەپێی یاسای ۳۲ ـی ساڵی ۱۹۸٦ مامەڵەیان لەگەڵ دەكرێت.
چوارەم / كێشەی ھاوڵاتیانی گەڕەكی باسكە باریك سەربەحرەكە وگەڕەكی ئاشتی كە پێشتر خانویان ھەبوە و ڕاگوێزراون قەرەبوو دەكرێنەوە بە پێدانی زەوی بە سود وەرگرتن لە زانیاریەكانی بەڕێوەبەرایەتی بەنداوی دوكــان.
٭ ھەروەھا پێدانی دەسەڵاتی چاك كردن و ڕاست كردنەوەی ھەڵەی ناو دراوە به بەڕێوەبەری گشتی شارەوانیەكان و سەرۆكی شارەوانی سەنتەری پارێزگان، له‌كاتێكدا پێشتر ئەم دەسەڵاتە لە ئەنجومەنی وەزیرانی حكومه‌تی هه‌رێمی كوردستان بووە.
٭ ھەر بۆ بەرچاو ڕونی زیاتری ھاوڵاتیانی قەزای دوكان داھاتی ئەم بڕە پارەیەی كە وه‌ك (رسومات) وەردەگیرێت لە ھاوڵاتیان، بۆ پڕۆژە خزمەت گوزاریەكان سنووری شارەوانی دوكان سەرف دەكرێت.
