پارتی و یه‌كێتی پێكه‌وه به‌پرۆژه‌یه‌كی هاوبه‌ش ده‌چنه به‌غدا
پارتی دیموکراتی کوردستان و یەکێتی نیشتمانی کوردستان، پيکەوە پڕۆژەیەکیان ئامادە کردووە، بۆ ئەوەی لەبەغدا لەگەڵ لایەنە عيراقییەکان گفتوگۆێ لەبارەوە بکەن .
کاکەمین نەجار، ئەندامی مەکتەبی سیاسیی پارتی دیموکراتی کوردستان، ڕایگەیاند:” داوایان لە حزبەکانی کوردستان کردووە، پێکەوە به‌یه‌كگرتوی بچینە بەغدا، پڕۆژەیەکیشیان ئامادە کردووە، بۆ ئەوەی گفتوگۆ لەگەڵ لایەنە عێراقییەکان بکەن و لەوە تێبگەن کە لەسەر چ بنەمایەک، به‌شداری له پێكهێنانی حكومه‌تی نوێی عێراقدا بكه‌ین”.
ئه‌ندامه‌كه‌ی مه‌كته‌بی سیاسی پارتی ڕاشیگه‌یاند:” بودجەی موچه‌ی ھەرێمی کوردستان و پرسی پێشمەرگە و دابینکردنی مووچە بۆ ھێزی پێشمەرگە لە ئەولەویەتی کارەکانیانە، ئەگەرلەسەر ئەوانە رێککەوتین، دواتر باسی پۆستەکانیش دەکەین”.
لای خۆشیه‌وه له لێدوانێكى ڕۆژنامه‌وانیدا عه‌لى حوسێن به‌رپرسی پەیوەندییە کوردستانی و عێراقييه‌كانى پارتی دیموکراتی کوردستان گوتى: “به‌رچاو ڕوونى ئێمه بۆ دانيشتنه‌كانى داهاتوو گرنگ بوو، له رابردوودا ته‌وافق نه‌مابوو، هه‌وڵ بوو بۆ گه‌ڕانه‌وه‌ى ته‌وافق، ئه‌گه‌ر ته‌وافق له حوكمڕانى عێراق ره‌نگ نه‌داته‌وه، بێگومان ره‌نگه ئه‌و هاوبه‌شييه راسته‌قينه‌يه‌ى كه بنه‌ماى به‌يه‌كه‌وه كاركردنى ئێمه بووه و له ده‌ستووردا هاتووه و له‌سه‌رى رێككه‌وتووين، نه‌مێنێت؛ ئه‌و كاته هاوسه‌نگى سياسى و هاوبه‌شى نامێنێت”.
به‌رپرسی پەیوەندییە کوردستانی و عێراقييه‌كانى پارتی دیموکراتی کوردستان گوتيشى:”له‌گه‌ڵ يه‌كێتى وا رێككه‌وتين به‌يه‌كه‌وه بين. به‌يه‌كه‌وه بچينه به‌غدا. هه‌ر يه‌كێكيشمان بچێت بێ ئاگادارى يه‌كدى نه‌بێت. هه‌وڵيش بده‌ين له سه‌ردانه‌كانى ئه‌مجاره به‌يه‌كه‌وه بين. هه‌وڵيش بده‌ين قه‌ناعه‌ت بۆ لايه‌نه‌كانى ديكه‌ش درووست بكه‌ين، چونكه چه‌ند كورد يه‌كڕيز بێت پێگه‌ى هه‌رێمى كوردستان به‌هێزتر ده‌بێت”.
