په‌رله‌مانتار و وه‌زیرێكی پێشووی ئیسرائیل، به تۆمه‌تی سیخوڕیكردن بۆ كۆماری ئیسلامی ئێران ده‌ستگیركرا.
گونین سیگیف، له لایه‌ن ده‌زگای هه‌واڵگری ئیسرائیل (شاباك)ه‌وه به تۆمه‌تی سیخوڕیكردن بۆ ئێران و یارمه‌تیدانی له كاتی شه‌ڕدا ده‌ستگیركراوه.
رۆژنامه‌ی (یه‌دیعۆت ئه‌حرۆنۆت)ی ئیسرائیل بڵاویكرده‌وه، ئه‌و وه‌زیره‌ی پێشووی ئیسرائیل تۆمه‌تباره به‌وه‌ی په‌یوه‌ندی له‌گه‌ڵ ئیتڵاعاتی ئێران هه‌بووه.
ده‌زگا ئه‌منییه‌كانی ئیسرائیل، ده‌ڵێن: سیگیف، له 2012ه‌وه ده‌ستی له‌گه‌ڵ ئیتڵاعات تێكه‌ڵكردووه.
به گوێره‌ی زانیارییه‌كان، ئه‌و وه‌زیره‌ی ئیسرائیل، كاتێك له نایجیریا بووه، له‌گه‌ڵ كارمه‌ندێكی باڵیۆزخانه‌ی ئێران كۆبووه‌ته‌وه و پاشان دوو جار سه‌ردانی ئێرانی كردووه.
هه‌روه‌ها زانراوه، ناوبراو له چه‌ند وڵاتێكی جیاواز له‌گه‌ڵ ئه‌ندامانی ئیتڵاعات كۆبووه‌ته‌وه.
(شاباك)، ئه‌و وه‌زیره‌ی به‌وه تۆمه‌تبار كردووه، كه زانیاری له باره‌ی پیشه‌سازی وزه، پێگه ئه‌منییه‌كانی ئیسرائیل، دامه‌زراوه سه‌ربازی و سیاسییه‌كان داوه‌ته ئیتڵاعات.
گونین سیگیف، له ساڵانی (1995 – 1996) وه‌زیری وزه و ژێرخانی ئیسرائیل بووه. پێشتریش له (1992- 1996) ئه‌ندامی كنێست بووه. دواتر وازی له كاری سیاسی هێناوه و خه‌ریكی بازرگانی بووه.
ناوبراو له 2004 به تۆمه‌تی بازرگانیكردن به مادده‌ی هۆشبه‌ره‌وه ده‌ستگیركراوه و پێنج ساڵ زیندانی بۆ بڕاوه‌ته‌وه و پاشان روویكردووه‌ته نایجیریا و له‌وێ ماوه‌ته‌وه.
