سه‌رۆك بارزانی له‌گه‌ڵ بالیۆزی ژاپۆن كۆبۆوه
سەرۆك بارزانی پێشوازی لە باڵیۆزی ژاپۆن لە عێراق کرد و لە دیدارەکەدا سەرۆك بارزانی هیوای سەركەوتنی بۆ باڵیۆزی ژاپۆن خواست و پێزانینی هەبوو بۆ ڕۆڵی وڵاتی ژاپۆن لە عێراق و جیهان و هیوای پتەوتربوونی پەیوەندییەكانی نێوان هەرێمی كوردستان و وڵاتی ژاپۆنی خواست.
ڕۆژی پێنجشەممە ٥ـی ٧ـی ٢٠١٨ لە سەلاحەددین سەرۆك مەسعود بارزانی پێشوازی لە فۆمیۆ ئیوان باڵیۆزی ژاپۆن لە عێراق كرد.
لە دیدارەكەدا كە كاتسوومی مۆریامۆ كونسووڵی ژاپۆن لە هەولێر ئامادە بوو، باڵیۆزی ژاپۆن لە عێراق سوپاسی سەرۆك بارزانی و حكوومەتی هەرێمی كرد كە هاوكار بوونە لەماوەی كاركردنی وەك باڵیۆزی ژاپۆن. باڵیۆزی ژاپۆن لە عێراق كە كۆتایی بە ئەرك و كارەكانی لە عێراقدا هاتووە هیوای بەردەوامی پەیوەندییەكانی نێوان هەرێم و وڵاتەكەی خواست. هەروەها كورتەیەكی لە چالاكیی كۆمپانیاكانی ژاپۆن لە كەرتی كارەبا و ئاو لە هەرێمی كوردستان خستەڕوو.
لای خۆیەوە سەرۆك بارزانی هیوای سەركەوتنی بۆ باڵیۆزی ژاپۆن خواست و پێزانینی هەبوو بۆ ڕۆڵی وڵاتی ژاپۆن لە عێراق و جیهان و هیوای پتەوتربوونی پەیوەندییەكانی نێوان هەرێمی كوردستان و وڵاتی ژاپۆنی خواست.
بارودۆخی سیاسیی عێراق لە دوای هەڵبژاردن تەوەرێكی تری ئەو دیدارە بوو و باڵیۆزی ژاپۆن نیگەرانییەكانی خۆی و وڵاتەكەی لەمەڕ پڕۆسەی سیاسیی عێراق لە قۆناغی ئاییندە بە سەرۆك بارزانی گەیاند. پەیوەست بە پڕۆسەی سیاسیی عێراق سەرۆك بارزانی جەختی لەوە كردەوە كە ئەگەر پڕەنسیپەكانی شەراكەت لە دەستەڵاتی جێبەجێكردن و تەوافوق لە یاسادانان و هاوسەنگی لە دامەزراوەكان ڕەچاو بكرێن هەرێمی كوردستان ئامادەیی تەواوی هەیە بۆ یارمەتیدانی پڕۆسەی سیاسیی عێراق و چارەسەركردنی گرفتەكان.
