كۆمیسیۆن: تۆماری ده‌نگده‌رانی هه‌رێمی كوردستان له ناوی دووباره و مردووان و ئاواره پاك كراوه‌ته‌وه
دوای ئه‌وه‌ی حكومه‌ت بڕیاری سازادنی هه‌ڵبژاردنی گشتی هه‌رێمی كوردستانی له 30/9/2018 ده‌كرد, له ئێستادا كۆمسیۆن ئاماده‌كاری ده‌كات بۆ به‌ڕێوه‌چوونی ئه‌و پرۆسه‌یه بۆ ئه‌م مه‌به‌سته تۆماری ده‌نگده‌رانی ئاماده‌كردووه, كه پاككراوه‌ته‌وه له ناوی دووباره‌و ناوی مردووان.
كاروان جه‌لال، به‌ڕێوه‌به‌ری داتا و زانیارییه‌كان له كۆمسیۆنی باڵای سه‌ربه‌خۆی هه‌ڵبژاردنه‌كانی هه‌رێمی كوردستان له كۆنفرانسێكی رۆژنامه‌وانیدا رایگه‌یاند، تۆماری ده‌نگده‌ران نوێكراوه‌ته‌وه و ئه‌م تۆماره له‌سه‌ر بنه‌مای فۆڕمی خۆراك دانراوه و وه‌زاره‌تی بازرگانی دڵنیایی كردووینه‌ته‌وه، كه ئه‌وان داتاكانیان مانگانه نوێده‌كه‌نه‌وه.
به‌ڕێوه‌به‌ری داتا و زانیارییه‌كان له كۆمسیۆن گووتیشی: له تۆماری نوێی ده‌نگده‌رانی ئه‌مجاره، ناوی دووباره و مردووان و ئاواره‌كانی تێدا نییه.
روونیشیكرده‌وه، پێشتر نه‌ده‌توانرا به‌و داتابه‌یسه‌ی هه‌بوو، هه‌ڵبژاردنه‌كانی ئاینده ئه‌نجام بدرێن. به‌ڵام به‌م داتا به‌یسه نوێیه‌ی درووستكراوه كۆمیسیۆن ده‌توانێت تا 18 ساڵی دیكه هه‌ڵبژاردنی پێ ئه‌نجام بدات.
دووپاتیشیكرده‌وه، داتابه‌یسه نوێیه‌كه هیچ ناوێكی ئاواره‌ی تێدا نییه و له به‌یانییه‌وه هاووڵاتیان ده‌توانن سه‌ردانی بنكه‌كانی ده‌نگدان بكه‌ن بۆ دڵنیابوونه‌وه له ناوه‌كانیان.
