لوتكه‌ی تره‌مپ و پۆتن كێشه‌كانی نێوان ئه‌مریكا و رووسیا سفرده‌كاته‌وه
دوای ئه‌وه‌ی ئه‌مڕۆ لوتكه‌ی تره‌مپ و پۆتین له هێلسینكی پایته‌ختی فینلند به‌سترا, دۆناڵد تره‌مپ، سه‌رۆكی ئه‌مه‌ریكا دووپاتیكرده‌وه، دوای لوتكه‌كه‌ی له‌گه‌ڵ ڤلادیمێر پوتنی هاوتا رووسیه‌كه‌ی، په‌یوه‌ندی نێوان واشنتۆن و مۆسكۆ كه له‌وپه‌ڕی گرژیدا بوون، له‌سایه‌ی ئه‌و لوتكه‌یه باشتر بوونه‌وه.
له كۆنگره‌یه‌كی رۆژنامه‌وانی هاوبه‌شدا له‌گه‌ڵ هاوتا رووسییه‌كه‌ی دوای لوتكه‌كه‌یان له هێلسنگی پایته‌ختی فێنله‌ندا، دۆناڵد تره‌مپ، سه‌رۆكی ئه‌مه‌ریكا گوتی: “هه‌تا له ماوه‌ی گرژییه‌كانیشدا له سه‌رده‌می جه‌نگی سارد، كاتێك كه جیهان ته‌واو له‌ئێستا جیاواز بوو، ئه‌مه‌ریكا و رووسیا ده‌یانتوانی پارێزگاری له گفتوگۆی لێكتێگه‌یشتن له‌نێوان خۆیاندا بكه‌ن، هیچ كاتێكیش په‌یوه‌ندیمان له‌ئێستا خه‌راپتر نه‌بووه”.
سه‌رۆكی ئه‌مه‌ریكا ئاماژه‌ی به‌وه‌شدا، “وێڕای هه‌موو ئه‌و گرژیانه‌ش، ماوه‌ی 4 كاتژمێره په‌یوه‌ندییه‌كانمان باشتر بوونه‌ته‌وه و متمانه‌ی ته‌واوم به‌و هه‌نگاوه هه‌یه”.
تره‌مپ روونیكرده‌وه: “له‌گه‌ڵ پوتن ژماره‌یه‌ك پرسی هه‌نوكه‌یی و جیاوازمان تاوتوێ كرد، كه به‌لای هه‌ردوو وڵاته‌وه گرنگن و گفتوگۆیه‌كی كراوه و به‌رهه‌مدارمان هه‌بوو”.
دووپاتیكرده‌وه، “گفتوگۆی بونیاتنه‌ر له‌نێوان ئه‌مه‌ریكا و رووسیا ده‌رفه‌تی كردنه‌وه‌ی رێگا به‌ره‌و ئاشتی و سه‌قامگیری له جیهان ده‌ڕه‌خسێنێت” و گوتی، “ناكۆكییه‌كانی نێوان دوو وڵاته‌كانمان باو و زانراون، ئه‌مڕۆ به‌تێری له‌گه‌ڵ سه‌رۆك پوتن تاوتوێمان له‌باره‌یه‌وه كردووه”.
تره‌مپ گوتی: “ئه‌گه‌ر بمانه‌وێت ئه‌و كێشانه چاره‌سه‌ر بكه‌ین كه تووشی جیهانه‌كه‌مان ده‌بن، پێویسته رێگه‌چاره‌كان بۆ هاوكاریكردنی یه‌كتر له‌سه‌ر بنه‌مای هاوبه‌شی بدۆزینه‌وه”.
