عەبادی سێ وەزیری دوور خستەوە
بەگوێرەی هەواڵێكی ئاژانسی هەواڵی (فورات نیوز)ی عێراقی، عەبادی هەریەك لە كازم حەمامی وەزیری گواستنەوە، قاسم فەهداوی وەزیری كارەبا و عەدیلە حەمود وەزیری تەندروستی بەشێوەیەكی كاتی لەسەر ئەركەكانیان لادەدات.
سەرۆك وەزیرانی عێراقی، وەك ڕێگەچارەیەكی بەپەلە بۆ دامركاندنەوەی خۆپێشاندانە بەرفرەوانەكانی باشووری عێراق، چەند ناوێكی بۆ بەڕێكردنی كاروبارەكانی وەزارەتەكانی تەندروستی و گواستنەوە و كارەبا و چەند پۆستێكی تری دەزگای جێبەجێكاری دەوڵەت دەستنیشان كردووە.
هەروەها بڕیاریش دراوە بەرپرسە ئیدارییەكانی دەزگای جێبەجێكردنی دەوڵەت لە پارێزگاكانی واست و باشووری عێراق بگۆڕدرێن، ئەمەش دوای شكستهێنانیان لە ڕاپەڕاندنی ئەركەكانیان و دابینكردنی خزمەتگوزاریە سەرەتاییەكان بۆ هاووڵاتیانی خۆیان.
نزیكەی نۆ ڕۆژە خۆپێشاندانێكی ناڕەزایی بەرفرەوان پارێزگای بەسرا و ژمارەیەكی بەرچاوی پارێزگاكانی تری باشوور و ناوەڕاستی عێراقی گرتووەتەوە، كە داواكاری سەرەكیان دابینكردنی ئاوی خواردنەوە و كارەبا و هەلی كارە، بەڵام هێزە ئەمنیەكانی عێراق بەئاگر و ئاسن ڕووبەڕوویان بوونەتەوە، تا ئێستە زیاتر لە 20 هاووڵاتی ناڕازی كوژراون، دەیانی تر بریندار و دەستگیر كراون
