ته‌قه له لە باڵەخانەی یه‌كی شاره‌وانی هه‌ولێر ده‌كرێت
نیوه‌ڕۆی ئه‌مڕۆ ٢٤ی٧ی٢٠١٨ له‌لایه‌ن چه‌ند هاوڵاتییه‌كه‌وه ته‌قه له‌باڵەخانەی یه‌كی شاره‌وانی هه‌ولێر كرا، قایمقامی هه‌ولێریش ده‌ڵێت، یه‌كێك له‌و هاوڵاتیانه ده‌ستگیركراوە.
نه‌به‌ز عه‌بدولحه‌مید، قایمقامی هه‌ولێر رایگه‌یاند:” ئه‌مڕۆ له‌لایه‌ن چوار هاوڵاتییه‌وه ته‌قه له‌باڵەخانەی شاره‌وانی یه‌كی هه‌ولێر كرا، توانرا یه‌كێك له‌و هاوڵاتیانه ده‌ستگیر بكریت سێ هاولاتیه‌كه‌ی دیكه‌ش هه‌ڵهاتن”.
قایمقامی هه‌ولێر راشیگه‌یاند:” یه‌كێك له‌و هاوڵاتیانه زیاده‌ڕۆی كردوه‌ته سه‌ر مۆڵكی حكومی و له‌لایه‌ن شاره‌وانی یه‌كی هه‌ولێره‌وه ئاگاداركراوه‌ته‌وه له‌سه‌ر ئه‌وه سه‌رپێچیه‌ی كه كردویه‌تی بۆئه‌وه‌ی ده‌ستبه‌رداری ئه‌و كاره بێت كه ئه‌نجامی داوه، به‌ڵام ئه‌و هاوڵاتیه له‌گه‌ڵ سێ برای دیكه‌یدا په‌لاماری بینای یه‌كی شاره‌وانی هه‌ولێریان داوه”.
نه‌به‌ز عه‌بدولحه‌مید گوتیشی” یه‌كێك له‌و هاوڵاتیانه ده‌ستگیكراوه‌و سێ كه‌سه‌كه‌ی دیكه‌ش هه‌ڵهاتوون لێكۆڵینه‌وه‌ش له‌رووداوه‌كه ده‌ستی پێكردوه”.
