داعش بزانە بۆچی زیندانیەكانی ئازاد دەكات
خواكوڕك
بەگوێرەی سەرچاوەی میدیاكان داعش لەئێستادا لەهەوڵی خۆ ئامادە كردن دایە بۆ رووبەرو بوونەوەی هێزی رزگار كەری مووسڵ و لەدواین هەوڵیشی دا چەكدارە زیندانی كراوەكانی خۆی رزگار دەكات.
دانیشتووێکی موسڵ بە كەناڵی رووداوی راگەیاندووە، داعش دەستی بە ئازادکردنی ئەو چەکدارانەی كردووە كە پێشتر بە تاوانی سووک زیندانیکرابوون”. بەگوتەی ئەو دانیشتووەی موسڵ، پێشتر دەیان چەکداری داعش لەسەر جگەرەکێشان، نەهێشتنەوەی ریش و شێوازی جلوبەرگیان لەلایەن رێکخراوەکە زیندانیکرابوون، بەڵام وەك ئامادەکاری بۆ شەڕی موسڵ داعش ئەو ئەندامانەی خۆی ئازادکردوون.
ئەو دانیشتووەی موسڵ کە دوو مانگ لەلایەن رێكخراوەکە زیندانیکراوە، باس لە هەوڵێکی دیکەی داعش دەکات بۆ مانەوەی زیاتر لە موسڵ و دەڵێت “چەکداران تۆڕێکی تونێلییان لەنێو موسڵ هەڵکەندووە و بەردەوامیش كار لەو تونێلانە دەكەن، فراوانی تونێلەکان هێندەی تێپەڕینی ماتۆرسکیلە بەنێویدا، داعش لەو هەوڵەی دا دەیەوێت هاتووچۆی چەکدارانی لەرێگەی گوندەکانەوە بۆ نێو موسڵ ئاسانتر بکات”.
