ئەنجوومەنی وەزیران جه‌ژنی چله‌ی هاوینێ له ئێزدیه‌كان پیرۆز ده‌كات
بەبۆنەی هاتنه‌وه‌ی جەژنی چلەی هاوینیی ئێزدییان ئەنجوومەنی وەزیرانی هەرێمی کوردستان پەیامێکی پیرۆزبایی ئاراستەی کوردانی ئێزدی لە کوردستان و جیهان دەکات.
پەیامەکەی ئەنجوومەنی وەزیرانی هەرێمی کوردستان کە بە زاری کرمانجی سەروو بڵاوکراوەتەوە وێنەیەکی بۆ(خواكوڕك) نێردراوە و ئەمەی خوارەوە دەقەکەیەتی:-
ب هه‌لكه‌فتنا هاتنا جه‌ژنا چلێ هاڤینێ یا ئێزدییان، پیرۆزباهییه‌كه گه‌رم ل هه‌موو خوشك و برایێن ئێزدی یێن كوردستانێ و جێهانێ دكه‌ین، هیڤیدارین ئه‌ڤ جه‌ژنه ب خێر و خۆشی بۆ كوردستانێ بگشتی و بۆ خوشك و برایێن ئێزدی بتایبه‌تی ڤه‌گه‌ڕیت. ئه‌م خۆشحالین كو ئیسال بۆ جارا ئێكێ پشتی جینۆسایدا شه‌نگالێ، خوشك و برایێن ئێزدی بۆ جه‌ژنێ سه‌ره‌دانا لالشا نوورانی دكه‌ن.
هه‌ر دڤێ هه‌لكه‌فتنێدا قوربانی یێن هه‌موو وان كاره‌ساتان ببیر تینین یێن كو ب سه‌رێ ئێزدی هاتی، بتایبه‌تی ژی ئێریشا تیرۆریستێن داعشێ ل سه‌ر ده‌ڤه‌رێن شنگالێ و ده‌ردۆرێن وێ كو د ئه‌نجامێدا هه‌ژماره‌كه مه‌زن یا خوشك و برایێن مه یێن ئێزدی شه‌هید بوون و هاتنه ڕه‌ڤاندن، به هزاران ژی ئاواره بوون.
هیڤیدارین جه‌ژن و بیرهاتنێن بهێن، خوشك و برایێن مه یێن ئێزدی ڤه‌گه‌ریابن سه‌ر جهێن ئازاد و ئاڤه‌دانكری یێن خۆ، ڕه‌ڤاندی یێن ده‌ستێ تیرۆرستان ژی دا ئازاد ببن. ئازادكرنا وان یه‌ك ژ كارێن هه‌ری ل پێشین یێن مه‌یه و هه‌تا هه‌موو خوشك برایێن ئێزدی تێنه ڕزگاركرن، ئه‌م دێ ل سه‌ر هه‌وڵ و كارێن خۆ بۆ ڕزگاركرنا وان به‌رده‌وام بین.
جاره‌كا دی جه‌ژنا چلێ هاڤینێ ل هه‌موو خوشك برایێن ئێزدی پیرۆز دكه‌ین، هه‌ر ساڵ ب خێر و خۆشی.
جڤاتا وه‌زیران یا هه‌رێما كوردستانێ
30/7/2018
