رۆژههڵاتی كوردستان پێنج حیزب هەڵوێستێکی پەکەکە ڕەت دەکەنەوە
![](https://xwakurk.com/wp-content/uploads/2018/08/hezbakani-eran.jpg)
لە کۆبوونەوەیەکدا دوێنێ سێشەممە ۷ی۸ی۲۰۱۸ لە بارەگای ناوەندیی سازمانی خەباتی کوردستانی ئێران ئەنجام درا، ناوەندی هاوکاریی حزبەکانی کوردستانی ئێران تاوتوێی رەوشی رۆژهەڵاتی کوردستان و دەرەنجامەکانی خۆپیشاندانەکانی ئێرانی کرد.
بەپێی میدیاکانی سەر بە حزبەکانی ناوەندی هاوکاری، لە کۆبوونەوەکەدا تاوتوێی پرسی ئابووریی رۆژهەڵاتی کوردستان و ئێران و کاریگەرییەکانی سەپاندنی سزاکان لەلایەن ئەمریکاوە بەسەر ئێران، کراوە.
هەر لەو کۆبوونەوەیەدا، ناوەندی هاوکاریی حزبەکانی کوردستانی ئێران هەڵویستی کۆداریان سەبارەت بە شەڕی چەکداریی دژی ئێران و دژایەتیی رووخاندنی کۆماری ئیسلامیی ئێران، رەت کردەوە.
پێشتر کۆدار دژایەتیی خۆی بۆ خەباتی چەکداری دژی کۆماری ئیسلامیی ئێران و هەر هەوڵێک بۆ رووخاندنی ئەو کۆمارە ئیسلامییە، راگەیاندبوو.
ناوەندی هاوکاریی حزبەکانی کوردستانی ئێران لە پێنج حزبی رۆژهەڵاتی کوردستان پێک دێت، کە بریتین لە؛
– حزبی دیموکراتی کوردستان (حدک)
– حزبی دیموکراتی کوردستانی ئێران (حدکا)
– کۆمەڵەی شۆڕشگێڕی زەحمەتکێشانی کوردستانی ئێران
– کۆمەڵەی زەحمەتکێشانی کوردستان
– سازمانی خەباتی کوردستانی ئێران
دۆناڵد ترەمپی سەرۆکی ئەمریکا چەند سزایەکی ئابووری بەسەر کۆماری ئیسلامیی ئێراندا سەپاندووە و هەڕەشەی لە هەر لایەن و کەسێکیش کردووە، کە هەوڵ بدات ئەو سزایانە بشکێنێ، ئەوا رووبەڕووی سزای ئەمریکا دەبێتەوە.