سیروان بارزانی:ڕاده‌ستكردنی كه‌ركوك هه‌ڵه‌ی پێشمه‌رگه نه‌بوو به‌ڵكو خیانه‌تی ۱٦ی ئۆكتۆبه‌ربوو
سیروان بارزانی فه‌رمانده‌ی میحوه‌ری گوێر و مه‌خمور هێزه‌كانی پێشمه‌رگه‌ی كوردستان له میانه‌ی وتووێژێكدا بۆ ده‌نگی ئه‌مریكا ڕایگه‌یاند:” هێزه‌كانی پێشمه‌رگه به‌مه‌رج ده‌گه‌رێته‌وه بۆ ناوچه جێناكۆكان یا ده‌بێت به‌هه‌ماهه‌نگی بێت له‌گه‌ڵ هاوپه‌یمانان و هێزه عیراقیه‌كان یاخود ناكرێت هه‌ركات ئه‌وان ویستیان بڵێن بگه‌ڕێنه‌وه بڵێن هێزمان به‌شی ئه‌وه هه‌یه ئێوه بگه‌ڕێنه‌وه ئێمه به فرمانی ئه‌وان كارناكه‌ین، به‌ڵام ئه‌گه‌ر ویستیان به‌هاوبه‌شی ئەو ناوچانە بەڕێەوە ببرێن و به‌فه‌رمی ڕایبگه‌یه‌نن ئه‌وا ئێمه ئاماده‌ین بگه‌ڕینه‌وه كه‌ركوك و ناوچه جێناكۆكه‌كان، كه‌چوینەوە جارێکی تر ناكشێینه‌وه “.
له‌باره‌ی گه‌رانه‌وه‌ی مه‌رجداری هێزه‌كانی پیشمه‌رگه‌ی كوردستان ، فه‌رمانده‌ی میحوه‌ری گوێر و مه‌خمور هێزه‌كانی پێشمه‌رگه‌ی كوردستان گووتی:” مه‌رجه‌كانی ئێمه یه‌كه‌م ئه‌وه‌یه ئه‌گه‌ر به‌هاوبه‌شی بێت وه‌ك پێش شه‌ڕی داعش ئه‌وا با به هاوبه‌شی بێت خۆ ئه‌گه‌ر هه‌ر بۆ ئێمه‌ی به‌جێبهێڵن وه‌ك ئه‌وه‌ی ئه‌و هێزانه ده‌چنه‌وه باشوری عیراق و ناوه‌ڕاستی عیراق به‌هۆی خۆپیشاندانه‌كان به‌ته‌نها بۆ ئێمه بێت ئه‌و ناوچانه ئه‌وا ئەوەش ده‌بێت، به‌ڵام ئه‌وه‌ش به‌مه‌رج ده‌بێت ، نه‌وه‌ك دواتر بێنه‌وه بڵێن هێزمان به‌شی ئه‌وه هه‌یه ئێوه بگه‌ڕێنه‌وه، ئێمه به ئه‌مری ئه‌وان كارناكه‌ین ئه‌گه‌ر به‌هه‌ماهه‌نگی و لێكتێگه‌یشتن بێت ئه‌وەش ئاماده‌ین به‌فه‌رمی چ بۆ كه‌ركوك یاخود ناوچه‌كانی تری ماده‌ی(١٤٠) كه عیراق یانز ساڵه به ئه‌نقه‌ست كێشه دروست ده‌كات و جێ به‌جێی ناكات ئێمه ئاماده‌ین به‌هه‌ماهه‌نگی و هاوبەشی له‌وێ بین به‌ڵام ناكرێت دواڕۆژ پێمان بڵێن بڕۆن بكشێنه‌وه كه‌چوینەوە جارێکی تر ناكشێینه‌وه .”
سه‌باره‌ت به‌وه‌ی ڕووداوه‌كانی(١٦) ی ئۆكتۆبه‌ر و چۆڵكردنی ناوچه كێشه‌له‌سه‌ره‌كان سیروان بارزانی ده‌ڵێت :” خه‌ڵكی ئه‌و ناوچانه باش ده‌زانن كه هه‌ڵه‌ی هه‌موو پێشمه‌رگه نه‌بوو خیانه‌ته‌كه‌ی (١٦)ی ئۆكتۆبه‌ر، به‌ڵكو خیانه‌تی ژماره‌یه‌كی كه‌م بوو، به‌ڵام ئه‌و هێزانه‌ی به‌شدارنه‌بوون له‌و خیانه‌ته به پێچه‌وانه‌وه خه‌ڵك زۆریان پێ خۆش ده‌بێت ته‌نانه‌ت من له‌و بڕوایه‌دام خه‌ڵكانی تریش ناڵێم له‌شۆڤێنیه‌كان به‌ڵام له‌برا توركمان و عه‌ره‌به‌كان بپرسیت له‌قوڵایی دڵیانه‌وه پێیان خۆشه پێشمه‌رگه له‌وێ بێت ئه‌گه‌ر به‌ته‌نها بێت یا به‌هاوبه‌شی چونكه ئه‌وان ده‌زانن ئه‌من و ئه‌مانه‌ت زۆر زۆر زیاتر بووه ئەوکاتەی پێشمەرگە لەو ناوچانە بوون.”
فه‌رمانده‌ی میحوه‌ری گوێر و مه‌خمور هێزه‌كانی پێشمه‌رگه‌ی كوردستان ده‌شڵێت:” له‌دوای خیانه‌ته‌كه‌ی كه‌ركوك ئاسایشی ئه‌و ناوچانه زۆر خراپتر بووە، هەرله‌كوشتن و دزی و ته‌قینه‌وه هه‌مووی زیادی كردووه، خه‌ڵكی “سڤیل”یش ئاسایشی پێ له‌هه‌موو شت گرنگتره ئه‌و ناوچانه‌ی پێشمه‌رگه‌ی لێبێت بێگومان سه‌روماڵی هاوڵاتیان پارێزراوه.”
له‌پاش ڕووداوه‌كانى خیانه‌تی۱٦ ى ئۆكتۆبه‌رى ساڵى ۲۰۱۷ و هاتنى سوپاى عێراق و هێزه‌كانى حه‌شدى شه‌عبی بۆ سنوورى ناوچه كوردستانییه‌كانى ده‌ره‌وه‌ى ئیداره‌ى هه‌رێمى كوردستان، خانه‌قین كه‌وته ژێرده‌ستى ئه‌و هێزانه و له‌وكاته‌وه تاوه‌كو ئێستا ڕۆژدواى ڕۆژ ژماره‌ى كرده‌وه تیرۆریستییه‌كان به‌رامبه‌ر به هاووڵاتیانى كوردى سنووره‌كه له زیادبووندایه
