ئه‌نجوومه‌نی عه‌ره‌بی كه‌ركوك: ناگه‌ڕێینه‌وه سه‌ر عێراق و وه‌ك برا له‌گه‌ڵ هه‌رێمی كوردستان ده‌ژین
خواكوڕك
ئه‌مرۆ له نێو ئه‌نجومه‌نی پارێزگای كه‌ركوك كوتله‌یه‌كی نوێ له‌نێو كوتله‌ی ئه‌نجوومه‌نی سیاسی عه‌ره‌بی كه‌ركوك راگه‌یانرا و ده‌ست له‌كاركێشانه‌وه‌ی خۆیان پێشكه‌شی كوتله‌ی پێشووتر كرد.
هه‌شت ئه‌ندامی ئه‌نجوومه‌نی پارێزگای كه‌ركوك كه پێنج ئه‌ندامیان پیاون و سێ ئه‌ندامه‌كه‌ی دیكه ئافره‌تن، كوتله‌یه‌كی نوێیان له نێو ئه‌نجهومه‌نه‌كه به‌ناوی ئه‌نجوومه‌نی عه‌ره‌بی كه‌ركوك راگه‌یاند.
شێخ ئیسماعیل حەدیدی جێگری ئەنجوومەنی عەرەبی كەركووك به وشه‌ی راگه‌یانددوه، ئەو هەشت ئه‌ندامه‌ی ئه‌نجوومه‌نی پارێزگای كه‌ركووك لە ئەنجوومەنی عەرەبی كشاینەوە، ئەنجوومەنێكمان پێكهێناوە بەناوی ئەنجوومەنی عەرەبی كەركووك، لە نێو ئەنجوومەنی پارێزگا كە پێنجیان پیاو و سێ تریشیان ئافرەتن.
هەروەها گوتی، ئەم ئەنجوومەنە نوێیە لە نێو ئەنجوومەنی پارێزگای كەركووك بەشێوازێكی تر مامەڵە و كار دەكات، راكان جبووری سەرۆكی ئەنجوومەنەكەیە كە هاوكات جێگری پارێزگاری كەركووكە و منیش وەك جێگری ئەنجوومەنەكە دەستنیشان كراوم.
هەروەها گوتی، دوای هاتنی داعش بۆ ناوچەكە، سیاسەتی راستەقینەی كورد بەرامبەر بە عەرەبە ڕەسەنەكانی كەركووك ڕوون بووەوە، بۆیە ئێمە بەهیچ شێوەیەك دژایەتی كورد ناكەین و جارێكی تر ئەو سیاسەتە پەیڕەو ناكەین كە پێشتر كاری لەسەر دەكرا.
هه‌روه‌ها ده‌شڵێت، ئێمە لەگەڵ كورد برای راستەقینەی یەكترین لە شارەكە، ئەگەر دوای ڕاوەدوونانی داعش و دەركردنیان لە عێراق، بە ڕاپرسی كەركووك بخرێتەوە سەر هەرێمی كوردستان، ئێمە پێشوازی لێ دەكەین و وەك برا لە نێو شاری كەركووك و لە چوارچێوەی هەرێمی كوردستان دەژین.
ئەنجوومەنی پارێزگای كەركووك لە 41 ئەندام پێكهاتووە و پارێزگای كەركووك یەكێكە لە ناوچە كوردستانییەكانی دەرەوەی ئیدارەی هەرێمی كوردستان و بەپێی دەستووری عێراق لە رێی مادەی 140ەوە چارەسەر بۆ یەكلاكردنەوەی داهاتووی شارەكە دانراوە.
