فواد مەعسوم: دژی ئه‌مریكا هاته ده‌نگ, ده‌ڵێت سزاكانی سه‌ر ئێران جێبه‌جێ ناكه‌ین
دوای ئه‌وه‌ی ئه‌مریكا بڕیاره‌كانی سزادانی ئێرانی گه‌ڕانده‌وه‌و له رێككه‌وتننامه ئه‌تۆمیه‌كه‌ی له‌گه‌ڵ ئێران كشایه‌وه داوای له سه‌رجه‌م وڵاتانی هاوپه‌یمانی كرد, كه دووربن له هه‌رمامه‌ڵه‌یه‌كی سیاسی و ئابوری له‌گه‌ڵ ئێران, له‌م چوار چێوه‌یه ئەمڕۆ یەكشەممە فوئاد مەعسوم سەركۆماری عێراق رایگەیاند وڵاتەكەی بڕیاری سزاكانی ئەمریكا بۆ سەر ئێران جێبەجێ ناكات و پابەندی نابێت. گوتیشی حەیدەر عەبادی سەرۆك وەزیران پەلەی كرد لەبارەی راگەیاندنی پشتگیری حكوومەتەكەی بۆ سزاكانی ئەمریكا.
مەعسوم لە دیدارێكی كەناڵی (ئەلعالەم)ی ئێرانیدا دووپاتی كردەوە كە عێراق ناتوانێت پابەندی بڕیاری سزاكانی ئەمریكا بێت بۆ سەر ئێران، ڕەنگە عەبادییش پەلەی كردبێت لەبارەی راگەیاندنی هەڵوێستی عێراق لە بەرانبەر ئەم سزایانی ئەمریكا بەسەر ئێرانیدا سەپاند.
سەركۆماری عێراق لەو دیدارەدا بەرگری لە بەرەی ئێران كردووە و دەڵێ رەنگە عەبادی ئەگەر لە كۆنگرەی رۆژنامەوانیدا نەبوایە، وەڵامێكی تری دابایەوە لەبارەی هەڵوێستی عێراق لەسەر سزاكانی ئەمریكا بۆ سەر ئێران، چونكە ئەوسا دەیزانی كە عێراق ناتوانێ پابەندی ئەو سزایانە بێت.
مەعسوم گوتیشی نەك حەیدەر عەبادی، هەر سەرۆك وەزیرانێكی تریش لە عێراق ناتوانێ پابەندی ئەو سزایانەی ئەمریكا بێت بۆ سەر ئێران، ئەمەش بەهۆی ئەو پەیوەندییانەی لە نێوان هەردوو وڵاتدا هەیە.
لە كۆتاییشدا گوتی كە لێدوانەكەی عەبادی تەنها قسە بووە نەك بڕیار لەبارەی سزاكانی ئەمریكا بۆ سەر ئێران، چونكە ئەم لێدوانە جێبەجێ ناكرێت.
