جێگری سوپا سالاری كوردستان: له باره‌ی گه‌ڕانه‌وه‌ی پێشمه‌رگه بۆ ناوچه داگیركراوه‌كان روونككردنه‌وه ده‌دات
دوای ئه‌وه‌ی له گفتوگۆكانی په‌یوه‌ست به پێكهێنانی حكومه‌تی نوێی عێراق پارتی ویه‌كێتی جه‌ختان له گه‌ڕانه‌وه‌ی پێشمه‌رگه كردووه بۆ ناوچه كوردستانیه داگیركراوه‌كان وه‌ك پیشمه‌رجێكی سیاسی, له‌و باره‌وه بەرپرسێکی باڵای پێشمەرگە ڕوونکردنەوە سەبارەت بە گەڕانەوەی پێشمەرگە بۆ ناوچە کوردستانییەکان دەدات
جێگری سوپاسالاری هێزی پێشمەرگەی کوردستان ئاماژە بەوە دەکات، کە وەزارەتی پێشمەرگە جەخت لەسەر ئەوە دەکاتەوە، کە لە کاتی گەڕانەوەی هێزی پێشمەرگە بۆ ناوچە کوردستانییەکانی دەرەوەی ئیدارەی هەرێمی کوردستان، مەلەفی ئەمنی بەهاوبەشی بەڕێوەببەن.
لیوا قارەمان کەمال، جێگری سوپاسالاری هێزی پێشمەرگەی کوردستان، ڕایگەیاند: “هەرکاتێک هێزی پێشمەرگە بگەڕێتەوە بۆ ناوچەکانی کوردستانییەکانی دەرەوەی ئیدارەی هەرێمی کوردستان، پێویستە مەلەفی ئەمنی بە هاوبەشی بەڕێوەببرێت، چونکە هێزی پێشمەرگە قبوڵی نییە بچێتە ژێر ڕکێفی هێزە عێراقییەکانەوە”.
جێگری سوپاسالاری هێزی پێشمەرگەی کوردستان، ئەوەشی خستە روو، کە لەمیانەی گفتوگۆی شاندەکانی هەرێمی کوردستان و لایەنە عێراقییەکان گەڕانەوەی پێشمەرگە بۆ ناوچەکانی کەرکووک و خورماتوو، یەکێکە لە خاڵەکان، بەڵام تا ئێستە بەفەرمی لەنیوان وەزارەتی پێشمەرگە و وەزارەتی بەرگری عێراق هیچ شتێکی فەرمی لەوبارەیەوە نییە، لەگەڵ ئەوەش دا وەزارەتی پێشمەرگە جەخت لەوە دەکاتەوە کە دەبێ مەلەفی ئەمنی بە هاوبەشی بەڕێوەببرێت.
ئاشکراشی کرد، کە یەکێک لەو مەلەفانەی تائێستا بە هەڵواسراوی ماوەتەوە و بۆ هەرێمی کوردستان گرنگە، مەلەفی پێشمەرگە و بودجەی پێشمەرگە و بابەتی بەڕێوەبردن و پاراستنی ئەمنیی ناوچە کوردستانییەکانی دەرەوەی ئیدارەی هەرێمی کوردستان، بەڵام هەموو ئەمانە لە حکوومەتەکانی پێشوزتری عێراقیش بە چارەسەر نەکراوی ماوەتەوە.
