چه‌كدارانی داعش له قه‌زای خانه‌قین گوندی (قایه)ی عه‌ره‌بنشین كۆنترۆڵ دەکەن
پاش کۆنترۆڵکردنەوەی ناوچە جێناکۆکەکان به هۆی خیانه‌تی ۱٦ـی ئۆكتۆبه‌ری ساڵی ۲۰۱۷وه له لایه‌ن میلیشیاكانی حه‌شدی شه‌عبی و هێزه ئێرانیه‌كان گرتنەوە دەستی دۆسیەی ئەمنیی ئەو ناوچانە، دانیشتووانی کوردی ئەو ناوچانە کەوتوونەتە بەر فشار و ناچار بە جێھێشتنی شوێنی خۆیان دەکرێن.
موقه‌ده‌م ئه‌حمه‌د مسته‌فا، فه‌رمانده‌ی فه‌وجی یه‌كی لیوای سێ-ی پیاده‌ی هێزی پێشمەرگە رایگه‌یاند “كاتژمێر ۱۰:۳۰ خوله‌كی شەو چه‌كدارانی داعش- كه ژماره‌یان ٤۰ چه‌كدار بووە، هه‌ڵیانكوتاوەتە سه‌ر گوندی قایه كه دانیشتوانه‌كه‌ی عه‌ره‌بی شیعه مه‌زهه‌بن، گونده‌كه‌یان كۆترۆڵكردووه. سێ ماڵ و دوو ئۆتۆمبێلیان سوتاندووه، دانیشتووانی گونده‌كه‌ش ئاواره‌ی چه‌مه‌كانی شێخ بابا بوون”.
فه‌رمانده‌كه‌ی فه‌وجی یه‌كی لیوای سێ-ی پیاده‌ی هێزی پێشمەرگە گوتی “داعش به هاوه‌ن، بیكه‌یسی و ئاڕبیجی هێرشیكردووەته سه‌ر گونده‌كه. دانیشتووانەکەی بۆ ماوه‌ی ۴۰ خوله‌ك رووبه‌ڕوویان وه‌ستاونه‌ته‌وه به‌ڵام دواجار داعش گونده‌كه‌ی كۆنترۆڵكردووە، به‌وهۆیه‌شه‌وه سێ كه‌س به‌سه‌ختی برینداركراون، دوو كه‌سی دیكه‌ش بێسه‌روشوێنن کە گومانده‌كرێت كوژرابن”.
هه‌روه‌ها موقه‌ده‌م ئه‌حمه‌د گوتیشی “دانیشتووانەکەی شیعه مه‌زهه‌بن. چه‌ند رۆژێك پێش ئێستا داعش داوای لێكردوون یادی ئیمامی حوسێن نەکەنەوە به‌ڵام ئه‌وان گوێیان به هه‌ڕه‌شه‌ی داعش نه‌داوه و ئاڵایان هه‌ڵكردووه، چونكه به‌شێك له دانیشتووانی گونده‌کە په‌یوه‌ندییان هه‌یه له‌گه‌ڵ چه‌كدارانی عه‌سائیب ئه‌هڵحه‌ق، ئه‌وان چه‌كیان پێداون بۆ پارێزگاریكردن له خۆیان”.
