مسته‌فا چاوڕه‌ش: نازانین ئه‌گه‌ر به‌رهه‌م ساڵح نه‌بێته سه‌رۆككۆمار هه‌ڵوێستی چی ده‌بێت
مستەفا چاوڕەش، ئەندامی سەرکردایەتیی یەکێتیی نیشتمانیی کوردستان ڕاگەیاند: “بەرھەم ساڵح، بەفەرمی لەسەر پشکی یەکێتی بۆ پۆستی سەرۆک کۆماری عێراق کاندید کراوە، بێگومان بە دەنگی ئەندامانی سەرکردایەتیی بۆ ئەو پۆستە کاندید کراوە، ھەرچەندە جارێ پۆستی سەرۆک کۆمار یەکلایی نەبووەتەوە“.
ئەندامەکەی سەکردایەتیی یەکێتی،ده‌ڵێت:” نازانێت ئەگەر بەرھەم ساڵح ئەو پۆستە وەرنەگرێ ھەڵوێستی چی دەبێت؟ بۆیە پێیوایە دەبێت ئەو پرسیارە لە خودی بەرھەم ساڵح بکرێت، دەشڵێت: ”دواجار ئەگەر ھەڵبژێردرا، ئەوا باشە، ئەگەر ھەڵنەبژێردرا، دەبێ ئیلتیزام بکات بەوەی کە لەناو یەکێتی بمێنێتەوە“.
مسته‌فا چاوڕه‌ش گوتیشی:” بەرھەم ساڵح خۆی بڕیاری داوە بگەڕێتەوە ناو ڕیزەکانی یەکێتی و دوای گەڕانەوەیشی بۆ ناو ڕیزەکانی یەکێتی، پۆستی جێگری سکرتێری گشتیی یەکێتی پێدراوەتەوە و جگە لەوەی ئێستا کاندیدە بۆ پۆستی سەرۆک کۆمار، جێگری دووەمی سکرتێری گشتیی یەکێتیشە، بۆیە تەمەنای ئەوە دەکەین بۆ پۆستی سەرۆک کۆمار دەربچێت، بەڵام ”ئەگەر کەسێکی دیکە بۆ ئەو پۆستە ھەبوو، ڕەنگە بۆ ئایندە ڕێککەوتن بکرێت“.
رۆژی ١٩ی٩ی٢٠١٨، بەرھەم ساڵح دوای نزیکەی پێنج مانگ جیابوونەوەی لە یەکێتی و دروستکردنی قه‌واره‌یه‌ك بەناوی ھاوپەیمانیی بۆ دیموکراسی و دادپەروەری، دواترقه‌واره‌كه‌ی خۆی بەجێ ھێشت وبه‌ئومێدی كاندیدبوونی بۆ پۆستی سه‌رۆككۆماری عێراق گەڕایەوە ناو یەکێتی و لە ھەمان رۆژ بوە کاندیدی یەکێتی بۆ سەرۆک کۆماری عێراق.
پارتی بە فەرمی رەتی کردووەتەوە کاندیدەکەی یەکێتی قبوڵ بکات،بەپێی تەوافوقی سیاسیی عێراق، کە لە دوای رووخاندنی رژێمی بەعس لە ساڵی ٢٠٠٣ـەوە پەیڕەو دەکرێ، سەرۆکایەتیی کۆماری عێراق بۆ کوردە، سەرۆکایەتیی پەرلەمان بۆ پێکھاتەی عەرەبی سوننە و سەرۆکایەتیی حکوومەتیش بۆ پێکھاتەی عەرەبی شیعەیە.
