كۆمسیۆن : نابێت له‌ڕۆژی ده‌نگدان هیچ كارمەندێك موستیلە و ئەڵقە و كاژێر بەكار بهێنیت
شێروان زرار، گوتەبێژی كۆمسیۆنی باڵای سەربەخۆی هەڵبژاردن و راپرسی هەرێمی كوردستان، رایگەیاند:” بۆ هەڵبژاردنی ٣٠ ئەیلول سەرجەم ئامادەكارییەكان تەواو بوون قەلەم وكاغەز و كەلو پەلی دەنگدان، كڕدراون و، گەیشتونەتە هەرێم و لەكۆگاكان دانراون، سبەی ئامادەكاری دەكرێت بۆ دابەشكردن و گواستنەوەیان بەسەر بنكەكاندا”.
گوتەبێژی كۆمسیۆنی باڵای سەربەخۆی هەڵبژاردن و راپرسی هەرێم گوتیشی” پیكهاتەی كاغەزی دەنگدان تایبەتە و جیاوازە، كۆپیكردنی ئەستەمە لەوڵاتی ئەڵمانیا دروستكراوەو، پەڕەیەكی كانزاییە، ئامێرێكی دڵنیایشی لەگەڵدایە،هەر كاغەزێك لە ئامیرەكە دەرنەچیت رەتدەكرێتەوە”.
شێروان زرار، گوتەبێژی كۆمسیۆنی باڵای سەربەخۆی هەڵبژاردن و راپرسی هەرێم راشیگه‌یاند:” ئەو قەڵەمەی بۆ نیشانەكردن بەكار دێت لە شیوەی مۆرێكە لەسەر ناو ژمارەی كاندید و قەوارە، جگە لە كارمەندانی كۆمسیۆن نابێت بەدەست هیچ كەسێكی ترەوە بێت، هەروەها دوای هەڵبژاردن دەبێت سەرجەم قەڵەمەكان بگەڕێتەوە بۆ كۆمسیۆن، كاغەزەكانیش كە زیادە بوون لەناو دەبرێن و پوچەڵدەكرێنەوە”.
گوتەبێژەكەی كۆمسیۆن ئەوەشی خستەڕوو كە” كۆمسیۆن ژمارەیەك بڕیاری دەكردوە، لەناویاندا نابێت هیچ كارمەندێك موستیلە و ئەڵقە و كاژێر بەكار بهێنیت، چونكە لەكاتی كۆكردنەوە ژماردنی دەنگەكان ئەگەر مۆرێك بەیەكێك لەوانە بنوسێنرێت ئەوا بە بچوكترین شێوە مۆری قەڵەمەكە بەر فۆڕمەكە بكەوێت پوچەڵ دەبێت، بۆیە نابێت ئەو مۆرە بەكار بهێنن”.
