داعش جارێكی تر له‌ عێراق سه‌رهه‌ڵده‌داته‌وه‌

دوای ئه‌وه‌ی حكومه‌تی عێراق كۆتاهاتنی داعشی له‌نێو خاكی عێراق راگه‌یاند به‌ پێی چه‌ند به‌ڵگه‌نامه‌یه‌كی نهێنی له‌ وه‌زاره‌تی ناوخۆی عێراق ئاشكرا بووه‌، كه‌ دامه‌زراندنی هێزێكی نوێی كوشنده‌ی داعش له‌ سه‌رانسه‌ری عێراق پشتڕاست ده‌كاته‌وه‌ و سه‌رجه‌م ئه‌ندامانی ئه‌و رێكخراوه‌‌ له‌ كه‌سانی رۆژنامه‌نووس و پسپۆرانی ته‌كنۆلۆژیای زانیاری “IT” پێكهاتوون و ئه‌ركیان به‌ئامانجكردنی ئه‌فسه‌رانی هێزه‌ ئه‌منییه‌كانی عێراق و كۆكردنه‌وه‌ی زانیارییه‌ له‌سه‌ریان.

به‌گوێره‌ی سایتی “غه‌د پرێس” له‌ به‌ڵگه‌نامه‌كه‌ی وه‌زاره‌تی ناوخۆدا ئاماژه‌ به‌ “نامه‌یه‌كی ئاژانسی وه‌زاره‌ت بۆ كاروباری هه‌واڵگه‌ری و به‌دواداچوونی فیدراڵ س.ف. 87132، له‌ 4/9/2018، هاوپێچكراو له‌گه‌ڵ نامه‌ی ده‌سته‌ی هه‌ماهه‌نگی هه‌واڵگه‌ری – شانه‌ی هه‌واڵگه‌ری نیشتیمانی نهێنی و راسته‌وخۆ، ژماره‌ 8132، له‌ 3/9/2018” دراوه‌‌.

له‌ناوه‌ڕۆكی به‌ڵگه‌نامه‌كه‌دا هاتووه‌‌، “چه‌ند زانیاریێك گه‌یشتوون،‌ باس له‌ پێكهێنانی هێزێكی نوێی كوشنده‌ له‌لایه‌ن داعشه‌وه‌ له‌ سه‌رانسه‌ری عێراق دوور له‌ سیاسه‌ت و ستراتیژییه‌تی پێشووی رێكخراوه‌كه‌یان ده‌كه‌ن و به‌چڕی كاری خۆیان ده‌كه‌ن”.

هه‌ر له‌و به‌ڵگه‌نامه‌یه‌دا ئاشكراكراوه‌، “سه‌ره‌تا كاری ئه‌و رێكخراوه‌ ئه‌منی و هه‌واڵگه‌ری بوو و ئه‌ندامانی داعش داوایان له‌ هه‌ندێ كه‌سی دیكه‌ كردووه بێنه‌ ناو رێكخراوه‌كه‌یان‌، كه‌ گومانیان له‌سه‌ر نه‌بێت و پێشتر ده‌ستگیرنه‌كرابن و شاره‌زای بواری كۆمپیوته‌ر بن یانیش هه‌واڵساز و رۆژنامه‌نووس بن”.

ئاماژه‌ی به‌وه‌شداوه‌، “مه‌به‌ستی ئه‌و رێكخراوه‌ نوێیه‌ی داعش بۆ به‌ ئامانجكردنی ئه‌فسه‌رانی هێزه‌ ئه‌منییه‌كانه‌ له‌ سه‌رجه‌م ئاژانسه‌كانی ئه‌منی له‌ پله‌ی “موقه‌ده‌م” به‌ره‌و سه‌ره‌وه‌ و كۆكردنه‌وه‌ی زانیارییه‌ له‌سه‌ریان”.