سـه‌رۆك بـارزانـی له‌گه‌ڵ جۆن ویڵكس باڵیۆزی به‌ریتانیا له عێراق كۆبووه‌وه
ئه‌مڕۆ چوارشەممە 3ـی 10ـی 2018 لە سەڵاحەددین, سەرۆك مەسعود بارزانی پێشوازی لە جۆن وێلكس باڵیۆزی بریتانیا لە عێراق كرد.
لە دیدارەكەدا باڵیۆزی به‌ریتانیا لە عێراق پیرۆزبایی سەركەوتنی پڕۆسەی هەڵبژاردنی په‌رلەمانی كوردستان و سەركەوتنی لیستی پارتی دیموكراتی كوردستان لە سەرۆك بارزانی كرد و هیوای خواست كە ئەو سەركەوتنەی پارتی دیموكراتی كوردستان كاریگەر بێت لە پێشخستنی هەرێمی كوردستان و بەهێزتربوونی بنەماكانی ژیانی دیموكراسی لە هەرێم.
هەر لەو كۆبوونەوەیەدا بارودۆخی سیاسیی عێراق و دوایین پێشهاتەكان لەبارەی پێكهێنانی حكوومەتی تازەی عێراق تاووتوێكرا و بیروڕا لەبارەی رۆڵی لایەنە كوردستانییەكان لە پرۆسەی سیاسیی عێراق ئاڵۆگۆڕ كرا.
پەیوەندییەكانی نێوان هەرێمی كوردستان و بریتانیا تەوەرێكی تری ئەو كۆبوونەوەیە بوو و باڵیۆزی بریتانیا لە عێراق جەختی لە ویستی وڵاتەكەی بۆ پەرەپێدانی ئەو پەیوەندییانە لە بواری ئابووری و كارگێڕی و ڕووبەڕووبوونەوەی گەندەڵی و دژایەتیكردنی تیرۆر كردەوە.
