ئاسایشی هه‌ولێر هه‌ر كه‌سێك ته‌قه‌ی خۆشی بۆ ئه‌نجامی هه‌ڵبژاردنه‌كان بكات ده‌ستگیری ده‌كه‌ین
به‌رده‌وامی كلتوری ته‌قه‌كردن بۆ ده‌ربڕینی خۆشی له هه‌رێمی كوردستان, له رابردوو بووه‌ته هۆی كاره‌ساتی نه‌خوازراو, وه‌ك ئاماده‌كاریه‌ك بۆ رێگه‌گرتن له ده‌ربڕینی خۆشی سه‌ركه‌وتنی حزب و قه‌واره سیاسیه‌كانی له هه‌ڵبژاردنی كوردستان ئاسایشی هه‌ولێر هۆشداری ده‌داته هه‌موو ئه‌وانه‌ی به ناوی “ده‌ربڕینی خۆشییه‌وه” ته‌قه ده‌كه‌ن و ئاشكراشی ده‌كات، به‌هۆی “ته‌قه‌كردنه‌وه” كه‌سێك ده‌ستگیركراوه.
تاریق نووری، به‌ڕێوه‌به‌ری گشتی ئاسایشی هه‌ولێر, رایگه‌یاند، ته‌قه‌كردن به‌ناوی ده‌ربڕینی خۆشییه‌وه به هه‌موو شێوه‌یه‌ك قه‌ده‌غه‌یه و هه‌ر كه‌سێكیش سه‌رپێچی بكات ده‌ستگیرده‌كرێت.
روونیشی كرده‌وه، پێشتر له چه‌ند ناوچه‌یه‌كی كوردستان به‌هۆی ته‌قه‌ی به‌ناو “خۆشییه‌وه” چه‌ند حاڵه‌تێكی نه‌خوازراو روویانداوه و نایانه‌وێش هه‌مان ئه‌و شتانه دووباره ببنه‌وه.
به‌رێوه‌به‌ری ئاسایشی هه‌ولێر روونیشی كرده‌وه، كه‌سێكیان ده‌ستگیركردووه كه به ئۆتۆمبێلێكی جۆری (بی ئێم ده‌بڵیو) له ناو شاڕ سووڕاوه‌ته‌وه و ته‌قه‌ی كردووه.
دووپاتی له‌وه‌ش كرده‌وه، هه‌ر كه‌سێك رێگه به‌خۆی بدات و به ناوی ده‌ربڕینی خۆشییه‌وه ته‌قه بكات، ده‌ستگیرده‌كرێت.
