گۆران له هه‌ر حاڵه‌تێكدا به‌شداری حكومه‌ت بكه‌ین ده‌بێت پۆستی جێگری سه‌رۆكوه‌زیرانی هه‌رێم وه‌ربگرین
نزار جەمال، ئەندامی جڤاتی نیشتمانی بزووتنەوەی گۆڕان، ڕایگەیاند: “بزووتنەوەی گوڕان، ساختەکاری لە دەنگەکانی کراوە و جارێ دوای سکاڵاکان ئەنجامی فەرمی ھەڵبژادنەکە بڵاو نەکراوەتەوە، بەڵام ئەگەر ئەنجامەکە بەفەرمی بڵاو بکرێتەوە، ئێمە قسەی خۆمان لەسەر دەرەنجامی ئەم ھەڵبژاردنە دەبێت“.
ئەندامه‌كه‌ی جڤاتی نیشتمانی بزووتنەوەی گۆڕان ده‌ڵێت:” ئەگەر دەرنجامەکانی هەڵبژاردن قەبوڵ بکەن، ئەوکاتە جڤاتی نیشتمانیی گۆڕان کۆدەبێتەوە و بڕیاری ئەوە دەدات کە بەشداری لە حکوومەتدا بکات یان نا ، ئەگەر لەھەر حاڵەتێکدا گۆڕان بەشداری لە حکوومەتی نوێدا بکات، ”یان پۆستی جێگری سەرۆک وەزیران و ھەر پۆستێکی دیکە وەربگرێت“ به‌رنامه‌و كارنامه‌یه‌كی هاوبه‌شمان بۆ چوار ساڵی داهاتوو ده‌بێت “. دەشڵێت: ”دەچینە ناو حکوومەتێکەوە، بە بەرنامە بتوانێ خزمەتی خەڵکی بکات“.
بزووتنه‌وه‌ى گۆڕان ساڵى ۲۰۰۹ له‌سه‌ر ده‌ستى نه‌وشیروان مسته‌فا دروست بوو، له‌و كاته‌وه به‌شدارى پرۆسه‌ى سیاسیى و په‌رله‌مانى كوردستان ده‌كات، له ۱۹ى ئایارى ۲۰۱۷دا نه‌وشیروان مسته‌فا كۆچى دوایى كرد ، له یه‌كه‌م هه‌ڵبژاردنى دواى ئه‌ویشدا له ۱۲ى ئایاری ئه‌مساڵ بۆ ئه‌نجومه‌نی نوێنه‌رانی عێراق و هه‌ڵبژاردنی په‌رله‌مانی كوردستان له ۳۰ـی ئه‌یلول ، گۆڕان شكستێكى گه‌وره‌ى خوارد.
ئەمە لە کاتێکدایە کە لە ماوه‌كانی ڕابردوودا له نێوخۆی بزووتنەوەی گۆڕاندا ململانێیەکی توند سەری هەڵداوە و گرووپێکی گەورەی گۆڕانخوازان لە گواستنەوەی خاوەندارێتیی کۆمپانیای (وشە) و گردی زەرگەتەی گۆڕان و میدیای بزووتنەوەکە بۆ سەر ناوی کوڕەکانی نەوشیروان مستەفا نیگەرانن و بەو هۆیەشەوە چەندان بەرپرسی باڵای گۆڕان دەستیان لەکار کێشاوەتەوە
