سیسته‌مێكی نوێی هاتووچۆ له هه‌ولێر جێبه‌جێ ده‌كرێت
موقه‌ده‌م فازڵ حاجی، گوته‌بێژی پۆلیسی هاتووچۆی هه‌ولێر، له هه‌ژماری تایبه‌تی خۆی له تۆڕی كۆمه‌ڵایه‌تی فه‌یسبووك، دامه‌زراندنی سیسته‌مه‌كه‌ی به وێنه و ڤیدیۆ روونكردووه‌ته‌وه.
فازڵ حاجی، له‌گه‌ڵ بڵاوكردنه‌وه‌ی وێنه و ڤیدیۆی روونكردنه‌وه‌یی سیسته‌مه‌كه، راشیگه‌یاندووه، ئه‌ندازه‌ی هاتووچۆی هه‌ولێر، به هاوكاری كۆمپانیایه‌كی ئیتاڵی پرۆفیشناڵ له‌بواری سه‌لامه‌تی هاتووچۆ و له‌سه‌ر بودجه‌ی په‌ره‌پێدانی هاتووچۆی هه‌ولێر، خه‌ریكی دانانی سیسته‌مێكی سه‌لامه‌تین كه پێی ده‌گوترێت (سیستمی به‌رپه‌رچدانه‌وه).
گوته‌بێژی هاتووچۆی هه‌ولێر، روونیشی ده‌كاته‌وه، كاری ئه‌و سیستمه ئه‌وه‌یه كاتێك ئۆتۆمبێلێك كۆنترۆل له‌ده‌ستده‌دات و خۆی پێداده‌كێشێت، به‌بێ هیچ زیانیكی گه‌وره، له رێگای سیسته‌مێكی سپرینگی ده‌یگه‌ڕێنێته‌وه سه‌ر شه‌قامه‌كه.
ئاماژه به‌وه‌ش ده‌كات، تێچووی دانان و هێنانی ئه‌م سیسته‌مه زۆره، به‌ڵام خه‌مخۆری وه‌زاره‌تی ناو‌خۆ و هاتووچۆی هه‌ولێر وایكرد كه ره‌زامه‌ندی وه‌ربگیرێت بۆ ئه‌وه‌ی له‌و شوێنانه‌ی كه پێویسته دابنرێت.
