ئه‌ندامه‌كه‌ی یه‌كێتی له لێژنه‌ی لێكۆلینه‌وه له رووداوه‌كه‌ی 16ـی ئۆكتۆبه‌ر ئاماده نیه ئه‌نجامی كۆتایی لێكۆلینه‌وه‌كه واژۆ بكات
دوای ئه‌وه‌ی پرۆسه‌ی لێكۆلینه‌وه له خیانه‌تی 16ـی ئۆكتۆبه‌ر به كۆتاهات, سه‌رۆكی لیژنه‌ی لێكۆڵینه‌وه له راستیی رووداوه‌كانی 16ـی ئۆكتۆبه‌ر رایگه‌یاند، كاره‌كانیان ته‌واو كردووه. زانیاری و به‌ڵگه‌كانیان له راپۆرتێكدا ره‌وانه‌ی سه‌رۆكایه‌تی په‌رله‌مانی كوردستان كردووه. له‌كۆی هه‌شت ئه‌ندامی لیژنه‌كه‌ش ته‌نها ئه‌ندامه‌كه‌ی یه‌كێتی واژووی له‌سه‌ر راپۆرته‌كه نه‌كردووه.
به گوێره‌ی زانیاریه‌كانی (خواكوڕك) دوای نزیكه‌ی 11 مانگ لێكۆڵینه‌وه و به‌دواداچوون بۆ ئاشكراكردنی راستییه‌كان، ئه‌و لیژنه‌یه‌ی، كه په‌رله‌مانی كوردستان بۆ لێكۆڵینه‌وه له رووداوه‌كانی 16ـی ئۆكتۆبه‌ر پێكیهێنابوو، هه‌فته‌ی رابردوو كاره‌كانیان ته‌واو كرد و راپۆرتی كۆتاییان ئاراسته‌ی سه‌رۆكایه‌تی په‌رله‌مانی كوردستان كردووه.
له‌و باره‌یه‌وه شوان شێخ ئه‌حمه‌د، سه‌رۆكی لیژنه‌كه رایگه‌یاند، ئێستا ناتوانن ناوه‌ڕۆكی راپۆرته‌كه بۆ رایگشتی ئاشكرا بكه‌ن، به‌ڵكو زانیاری و به‌ڵگه‌كان خراونه‌ته به‌رده‌ستی سه‌رۆكایه‌تی په‌رله‌مانی كوردستان.
به‌ڵگه و زانیارییه‌كانی راپۆرتی كۆتایی لیژنه‌كه‌ی په‌رله‌مانی كوردستان له باره‌ی رووداوه‌كانی 16ـی ئۆكتۆبه‌ر، له‌كۆی 8 ئه‌ندامی لیژنه‌كه7 ئه‌ندامیان واژوویان كردووه و ته‌نیا ئه‌ندامه‌كه‌ی یه‌كێتی واژووی نه‌كردووه، هۆكاره‌‌كه‌شی بۆ ناڕازی بوونی یه‌كێتی له ناوه‌ڕۆكی راپۆرته‌كه ده‌گه‌ڕێته‌وه.
بێستون فایه‌ق، ئه‌ندامی په‌رله‌مانی كوردستان له بزوتنه‌وه‌ی گۆڕان رایگه‌یاند، ئه‌ركی ئێمه ته‌واو و ئیدی ئه‌ركی سه‌رۆكایه‌تی په‌رله‌مانه، كه چۆن ئامانجی لیژنه‌كه به ئه‌نجام ده‌گه‌یه‌نێت.
هه‌روه‌ها ئه‌ندامانی لیژنه‌ی لێكۆڵینه‌وه له راستی رووداوه‌كانی 16ـی ئۆكتۆبه‌ر له خورماتوو ده‌ورووبه‌ری، به‌ڵگه و زانیاری ته‌واویان له‌سه‌ر كه‌مته‌رخه‌می هه‌ندێك له‌به‌رپرسه سه‌ربازییه‌كانی یه‌كێتی له‌و سنووره ده‌ست كه‌وتووه كه بوونه‌ته هۆكاری سه‌ره‌كی بۆ ئه‌و پاشه‌كشه و ماڵوێرانیه‌ی كه به‌سه‌ر خه‌ڵكی ئه‌و ناوچانه‌دا هاتووه، چاوه‌ڕێش ده‌كرێت له خولی داهاتووی په‌رله‌مانی كوردستاندا دوا راپۆرتی لیژنه‌كه ره‌وانه‌ی لایه‌نه په‌یوه‌ندیداره‌كانی حكومه‌تی هه‌رێم و ده‌سه‌ڵاتی دادوه‌ری بكرێت بۆ لێپرسینه‌وه له‌و به‌رپرسانه‌ی له راپۆرته‌كه‌دا ناویان هاتووه.
